1867/2023-2024

Lawngtlai dated 13th September 2023: Vawiin chawhnu khan Chief Medical Officer's Conference Hall, Electric veng, Lawngtlaiah kar hnih awh tur, mipui hriselna tihhmasawnna beihpui thlakna 'Ayushman Bhavah' Campaign chu Pu H.Lalhmingthanga, Deputy Commissioner-in a hawng a. Dr. S. Thaizi, Dy. Chief Medical Officer chuan hun kaihruaiin khawtlang hriselna tur a mipui tel vena tur Jan Arogya Samiti leh Village Health, Sanitation & Nutrition chungchang inzirtirna leh TB natna veite chhawmdawlna ‘Nikshay Mitra’ chungchang inhrilhhriatna hun hman nghal a ni.

Deputy Commissioner Pu H.Lalhmingthanga chuan Lawngtlai chu district zau tak leh a chhung a chengte pawh kawng hrang hrang a dinhmun inang lo tak tak an nih avangin hmasawnna inkhairual thlen tir a pawimawh thu a sawi a. Heng hmasawnna hna tihlawhtling tur hian sawrkar hnathawkte leh khawtlang leh tlawmngai pawl hrang hrangte tanrual a tul thu a sawi. Deputy Commissioner chuan Sawrkar chu mipuite tan a rawngbawltu an nih angin mipui hriselna tih hmasawnna tur a ‘Ayushman Bhavah’ kalpui tur pawh hi khawtlang leh tlawmngai pawl hrang hrang hruaitute chuan he program a hlawhtlin theih nan intineitu takin a tul apiangah thawktute pui zel turin a chah.

Pu H.Lalhmingthanga chuan hrisel tur chuan faina ngaih pawimawh hmasak a pawimawh thu sawiin mahni taksa invawn fai bak ah mahni chenna in leh a vel vawn fai leh bawlhhlawh kan paih dan ah te fimkhur a tul thu sawiin faina kawng a midangte entawntlak ni turin kalkhawmte a fuih bawk a ni.

Dr. S.Thaizi, Dy. Chief Medical Officer chuan Lawngtlai district-ah ‘Ayushman Bhavah’ chu October ni 6, 2023 thleng Health & Wellness Centre 28-ah kalpui tur a nih thu leh hemi chhung hian natna inkaichhawn theih loh (Non-Communicable diseases) endikna hun te, TB leh Malaria vei leh vei loh endikna hun leh khawsak harsa zawk te tan a hriselna inenkawlna senso chhawk zangkhai tur a PM-JAY chungchang inzirtirna leh inziahluhna hun buatsaih tum a nih thu a tarlang a. Blood donation camp, Hospital tihfai hnatlang leh Organ Donation Campaign-te kalpui a nih bawk tur thu a sawi.

Khawtlang hriselna kawng a hmalakna hrang hrangah khawtlang hruaitute tel ngei ngeina tur ‘Jan Arogya Samiti’ leh Village Health, Sanitation & Nutrition Committee chungchang inzirtirna hun Pi Blondie H.Laldinpuii, ASHA Coordinator-in a hmang a. Pu H.Vanlalpeka, DTC, Lawngtlai chuan Sawrkar ruahmanna hnuai a mi inphal ten TB vei zing a chhawmdawl ngaite an chhawmdawl theih nana ‘Nishay Mitra’ kalpui a nih dan tarlanna hun hmangin India ramah TB natna chu kum 2025 chhung a um bo hman tum a nih thu a tarlang bawk a ni.

Ayushman Bhavah hawnna hun ah hian District Medical Superintendent, District Information & Public Relations Officer, District Program Officer, Lawngtlai khaw chhung VCP, President MJA, CYLA, MHIP, LWA leh Association for Voluntary Blood Donation hruaitute an tel a ni.