1866/2023-2024

Champhai the 13th September, 2023 - Kan hma lawka MLA General Election, 2023 neih tur pualin vawiin khan Multipurpose Hall Govt. Champhai College ah SVEEP Campaign buatsaih a ni a, Pu James Lalrinchhana, District Bawrhsap chuan khuallian niin a hmanpui.

‘Systematic Voters’ Education and Electoral Participation (SVEEP)’ hi Election Commission of India (ECI) hnuaia Flagship Program pawimawh tak niin, election kaihhnawih thil pawimawhte mipui zirtirna leh vote thlak pawimawh zia inzirtirna kawnga hmalakna a ni.

Champhai DC & District Election Officer Pu James Lalrinchhhana chuan thusawiin, inthlanpui lo awm mai tur puala hun tha tak an hmang thei leh vote thlak tute tana hriattur pawimawh tak tak ngaihthlak a ni tur chu lawmawm a tih thu a sawi.

Bawrhsap chuan Democracy hlut zia ngaihtuah a tul tih sawiin thenawm ram Myanmar ah chuan buaina a chhuah avangin Mizoramah raltlan tam tak kan neih phah tih a sawi a, Champhai District hian raltlan a ngah ber tih sawi bawkin an ram buaina chhan bul ber te zinga mi chu Myanmar ram chu Democracy ram a nih loh vang a nih thu a sawi a. Vote neih ngaihsak lo tam tak an awm thin chu thil pawi tak a nih thu a sawi a, kum 18 tling tawh phawt chuan vote an neih ngei ngei a ngai tih sawiin kum 18 hnu lamah chuan Vote neih a har tawh thin tih a sawi a, puitling nih hnuah phei chuan Vote nei turin beih fe a ngai tawh tih a sawi bawk.

Pu James Lalrinchhana chuan inthlan lo awm turah chuan Vote thlak theuh turin Champhai District mipuite a sawm a, zirlai te pawh vote thlak hunah chuan mahni khaw lama haw a ngai a nih pawhin vote thlak tura haw hram turin a ngen a, zirtirtute pawhin he hun pawimawh bikah hian an zirlai khaw dang leh thingtlang zawk atanga lo kal te haw tir phalsak turin a ngen nghal bawk.

Tunlai khawvel changkang zelah Voter ID a pawimawh tawlh tawlh dawn tih a sawi a, Adhaar Card te nen thlun zawm mek niin Bank nen thleng pawha thlunzawm mek a nih avangin Voter ID nei lo te an chep tawlh tawlh dawn tih a sawi a, hei vang pawh hian tun atanga tan la thar a, vote nei thei tawh, vote la nei si lote vote nei tura hmalak a hun tih a sawi a, inthlanpui lo awm turah hian zirlai te chu vote thlak ngei ngei turin a chah a, an awmna hmun theuha hrilh darh zel turin a sawm bawk.

He hun hi Govt. Champhai College Multipurpose Hall, ah hman niin Pu Benjamin Zalawma Ralte, Election Officer chuan kaihruaiin, Pu Lalrinawma Khiangte,SDO (S), Pi Lalhruaitluangi, BDO Pu Moses Lalfakawma Tlau, SDC, Dr. Vanlalnunpuii Ralte, SDC Champhai District SVEEP Nodal Officer te hnen atangin Election kaihhnawiha voter te hriat tur tul pawimawh hrang hrang ngaihthlak a ni a.

Election Quiz neih a nih bakah Mangheta Chinzah, District SVEEP Icon chuan Special item neiin, Evangelical Union, GCC te chuan Skit an entir a, hun hlimawm leh hlawk thlak tak hman ho a ni a. Zirlaite hian EVM hmangin vite thlak dan a takin an zir bawk a ni.