122/2024-2025 

2024 Ṭau thla ni 9: Lok Sabha Inthlanpui, 2024 atana Lawngtlai District chhunga inthlan buaipui tura ruat, Presiding Officer (PRO), Assistant Presiding Officer (APRO) leh Polling Officer (PO)-te tana training thawh hnihna chu vawiin khan Lawngtlai, Chawngte leh Sangau hmunah te buatsaih a ni.

Lawngtlaiah hian Government Lawngtlai College-ah training hi buatsaih niin, Pu Collin Hlychho, BDO Lawngtlai; Pu Samuel Lalmalsawma Sailo, SDC; Dr Doris Lalrinawmi, SDC; Pi Saithantluangi Zote, SDC leh Pu Remlalnghaka, Associate Professor, GLTC te'n training an pe a. Chawngteah chuan Kamalanagar Public School-ah buatsaih niin, Chawngte Sub-Divisional Officer (Civil) Pu Lalneihthanga Colney; Dr Jyotir Moy Chakma, Associate Professor, GKC leh Pu Sadanand Chakma, DTO, CADC te'n training an pe a. Sangauah chuan BDO Conference Hall-ah buatsaih niin, Pu Chinlianmanga, Sangau SDO(C); Dr C. Ramhnehzauva, Assistant Professor, GLTC leh Dr David V. Khiangte, Assistant Professor, GLTC te'n training hi an pe a ni.

Training-ah hian inthlan buaipuina kawnga polling official-te hriat tur pawimawh hrang hrang a thua zir ho leh enchhin a nih bakah, chawhnu lamah Electric Voting Machine (EVM) hman dan a taka zir hona buatsaih a ni bawk.

Lawngtlai District chhunga assembly bial pathuma polling station 181 awmah inthlan buaipui turin PRO 1, APRO 1 leh PO 2 ṭheuh an awm dawn a. Inthlannaa duty turte thliar fel thawh hnihna (2nd randomisation) chu vawiin khan RO office Aizawl aṭangin buatsaih a ni a. Election Commission of India (ECI)-in ruahmanna a siam angin 3rd randisation pawh kalpui leh a la ni ang.

Lok Sabha Inthlanpui, 2024 buatsaih turah hian Lawngtlai District chhunga Tuichawng biala polling station 70 awm zingah hmeichhe hlang duty-na tur (all women managed) polling station 4 awmin, Lawngtlai West biala polling station 69 zinga 8 chu hmeichhe hlang duty-na tur a ni thung a, Lawngtlai East biala polling station 42 zinga 8 chu hmeichhe hlang duty-na tur a ni bawk. Hei bakah hian assembly constituency tinah ṭhalai hlangin inthlan an buaipuina tur (all youth managed) polling station pakhat ṭheuh ruahman niin, model polling station-a cheibawl tur bial tinah polling station pakhat ṭheuh ruahman a ni bawk.