217/2024-2025 

2024 Ṭau thla ni 16: Lok Sabha Inthlanpui, 2024 atana Lawngtlai District chhunga inthlan buaipui tura ruat, Presiding Officer (PRO), Assistant Presiding Officer (APRO) leh Polling Officer (PO)-te tana training thawh thumna leh a hnuhnung ber chu vawiin khan Lawngtlaiah buatsaih a ni.

Vawiin training hi hmun thumah buatsaih niin, Lawngtlai District Election Officer & Assistant Returning Officer Pu Cheemala Siva Gopal Reddy chuan training-na hmun hi a tlawh kual a. Polling official-te chu inthlan felfai tak buatsaih a nih theih nan ṭha taka an chanvo hlen chhuak tura chahin, duhsakna a hlan nghal a ni.

36-Tuichawng assembly constituency huam chhunga duty tur tan Chandmary Inpui-ah training hi buatsaih niin, Pu Remlalnghaka, Associate Professor, GLTC leh Pu Collin Hlychho, BDO Lawngtlai te'n training an pe a. 37-Lawngtlai West bial chhunga duty tur tan CYLA Hall-ah training buatsaih niin, Dr David V. Khiangte, Assistant Professor, GLTC; Pu Lalneihthanga Colney, SDO (Civil), Chawngte leh Pi Saithantluangi Zote, SDC te'n training an pe a. 38-Lawngtlai East biala duty tur leh reserve-a awmte tan Bazar YLA Hall-ah training buatsaih niin, Dr C. Ramhnehzauva, Assistant Professor, GLTC leh Pu Samuel Lalmalsawma Sailo, SDC te'n training hi an pe a ni.

Training-ah hian inthlan buaipuina kawnga polling official-te hriat tur pawimawh hrang hrang a thua zir ho leh enchhin a nih bakah, chawhnu lamah Electric Voting Machine (EVM) hman dan a taka zir hona buatsaih a ni bawk.

Lawngtlai District chhunga assembly bial pathuma polling station 181 awmah inthlan buaipui turin PRO 1, APRO 1 leh PO 2 ṭheuh an awm dawn a. Polling official-te leh an kalna tur polling station hi siam fel tawh a ni a. Polling station-a inthlan buaipui tura ruat zingah harsatna avanga duty hlen chhuak thei lo an awm thulha an ai awh tur thlaveng (reserve) atan mi eng emaw zat ruat an ni bawk.

Lawngtlai District chhunga polling station 181 zinga Lawngtlai aṭanga hla zual polling station 116-a duty tur polling party-te chuan naktuk, April ni 17, 2024 khian an duty-na tur hmun an pan ang a. A bak zawng polling station 65-a duty tur polling party-te chuan naktip, April ni 18, 2024 khian an duty-na tur hmun an pan ve thung dawn a ni.

Attachment

  • Loading attachment...