Vawiin khan Lawngtlai District Task Force & Committee for Elimination of Malaria leh Committee on Integrated Approaches for Prevention & Control of Childhood Pneumonia and Diarrhoea chu an Chairman, District Bawrhsap Dr Arun T., IAS hovin Lawngtlai DC Conference Hall-ah an țhu khawm a. Lawngtlai District chhunga malaria tirem tur leh pneumonia leh kawthalo vanga naupang thihna titlem tura hma lak dan tur kawng hrang hrang an sawi ho.

Lawngtlai DC chuan hriselna kawnga hma lakna hrang hrang chu health department kut chauhva dah lo va, sawrkar department dangte leh tlawmngai pawlte nen tang ruala hma lak a tul thu a sawi a. District chhunga malaria tirem tur leh pneumonia leh kawthalo vanga naupang thihna titlem tur paw'n line department-te'n mahni kova mawhphurhna tla chu rang taka an hlen chhuah a pawimawh dawn a ni, a ti a. District hriselna atana hna thawh chu mi tin mawhphurhna a ni tiin, tan rualna leh thawh hona tha tak nen lo chuan hmasawnna hmuh a beiseiawm lo a ni, a ti.

He hunah hian line department hrang hrang - Social Welfare, Education, PHE, RD, LAD, PWD leh World Vision te'n Health Department nen tang tlanga hma lakna tur hrang hrang an neih te sawi ho a ni a. Tlawmngai pawl hrang hrang leh media lamin tha an thawh ve theih dan tur te pawh sawi ho nghal a ni.

Lawngtlai District hi Intensified Malaria Control Programme stage-III hnuaiah a awm mek a. Nikum 2016 (January-July) chhung khan malaria case 1516 hmuh niin, malaria vanga thihna tum 2 a thleng a. Kumin 2017 July thleng khan malaria case 1608 hmuh tawh niin, thi erawh an la awm lo thung.

Kum 2011 chhiarpuia a  lan danin, Lawngtlai District chhungah naupang kum 5 hnuai lam 13,390 an awm a. Kum khat chhungin naupang kawthalo case hi 32,136 vel thleng tura ngaih niin, naupang 19 vel zetin thihpui tura ngaih a ni a. Naupang pneumonia case hi 3,749 vel thleng anga chhut niin, naupang 21 vel zetin an thihpui anga chhut a ni.