Vawiin chawhnu khan Millenium Centre Roof Top-ah  Sawrkar Laipui program “Pradhan Mantri Ujjwala Yojana” hawnna neih a ni a. Chief Minister Pu Lal Thanhawla chu Khuallian niin Mizoram tlawh a lo zin, Union Minister of State for Culture Dr. Mahesh Sharma chu Khualzahawm a ni. He scheme hi Sawrkar Laipuia Ministry of Petroleum & Natural Gas kalpui a ni.

Chief Minister chuan Pradhan Mantri Ujjwala Yojana hawnna neih a ni chu lawmawm a ti a. Hmeichhiate hamthatna bakah hriselna lama hmasawnna leh ramngaw humhalhna scheme hian a keng tel a ni ,a ti a. Mizoram hian ram leilung hausakna a bik takin natural gas laichhuah loh thahnem tak a neih thu sawiin hemi kawnga hmalak a tul thu a sawi a. Gas distributor tam zawk neih a pawimawh thu a tarlang bawk a ni.

Union Minister of State Dr. Mahesh Sharma chuan India ram zalenna a hmuh hnu kum tam takah pawh mi rethei zawk te’n Sawrkar hmalakna hnuaia hamthatna an changlo anih chuan mipui tana siam Sawrkar hi a hlawhchham a ni, a ti a. Thing tuah atanga meikhu lo chhuak chuan mihring hriselna nasa takin a nghawng thu leh hun a heh thu a sawi a. Scheme thar hian ram mipui a bikin hmeichhia leh naupangte nun hrisel zawk a siamsak a, boruak bawlhhlawh titlemin thing leh mau humhalh kawngah pawh nasa takin a pui dawn a ni, a ti.

Pradhan Mantri Ujjwala Yojana( PMUY) hi Below Poverty Line (BPL) chhungkuaa hmeichhiate tan gas connection awlsam taka neih theihna tura  Sawrkar hmalakna a ni a.Oil Marketing Companies (OMCs)-te kaltlangin LPG connection hi pek tum niin kum thum chhungin (2016-2019) BPL chhungkua vaibelchhe 5 hnena pekchhuah tum a ni. He Scheme-in a tum ber chu BPL chhungkua leh naupang tana ei leh in thianghlim leh hrisel zawk neih theihna tura hmalak a ni. Scheme hi May Ni 1, 2016 khan Balia, Uttar Pradesh-ah hawn niin India ram state hrang hrangah kalpui mek a ni. Scheme hamthatna dawng thei tur chuan BPL chhungkua Social Economic Caste Census 2011-a inziak lut  Aadhar card leh Bank Account nei an ni tur a ni.  

He programah hian IOCL Executive Director Pu Dipankar Ray chuan kalkhawmte lawmna thu a sawi a. PMUY hnuaia beneficiary 10 –te hnenah LPG connection semna neih nghal niin Oil Industry State Level Coordinator Pu PP Burahgohain chuan  lawmthu sawina in hun a khar a ni.

Programme hi Lok Sabha MP,  Pu CL Ruala chuan hmanpuiin Oil Marketing Companies (OMCs) hrang hrang IOCL, BPCL, HPCL hotute an tel a ni.

Union Minister of State for Culture Dr. Mahesh Sharma hi vawiin khan Mizoram lo thlengin Art & Culture Minister Pu R. Romawia’n a lo dawngsawng a. Union Minister of State hi ni hnih cham tura lo kal a ni.