Vawiin tlai khan Raj Bhavan-ah Union Minister of State for Culture Dr. Mahesh Sharma leh Indian National Trust For Art and Cultural Heritage (INTACH) Mizoram Chapter hruaitute an thukawm.

Union Minister of State for Culture Dr. Mahesh Sharma chuan INTACH Mizoram Chapter hmalakna te chu tha a tih thu leh Mizorama pipute sulhnu leh thil hlui te humhalhna kawnga an hnathawh chu lawmawm a tih thu a sawi a. INTACH hotute chuan Archaeological Survey of India (ASI) Aizawl Circle hawn a ni tur chu lawmawm an tih thu an sawi a. Union Minister hnenah chuan Dungtlang, Lianpui , Farkawn leh Lungphunlian khuate chu hmun pawimawh “national importance” a  puan thuai anih theih nan hmalak pui turin an sawm a. INTACH hotute chuan Aizawl Circle chuan tha taka Tripura, Manipur leh Mizoram a enkawl theih nan Superintending Archaeologist an mamawh thu Union Minister hnenah chuan  thlenin Vangchhiaa thil hlui  laihchhuah hna nikuma chawlh tak chu chhunzawm leh thuai theih an duh thu an sawi bawk a ni. Union Minister of State for Culture Dr. Mahesh Sharma chuan theihtawpa hma a lakpui tur thu leh a hnena an thil thlen te chu alo bawhzui tur thu a sawi a ni.

Meeting-ah hian Additional Director- General ASI Pu Rakesh Singh Lal leh INTACH Mizoram Chapter aiawhin Pu P. Rohmingthanga IAS (rtd.) Convener, Pu L. Rin Sanga Co-Convener, Pu C. Chawngkunga Co- Convener, Dr. R Kapthuama leh Pu Lalzidinga Sailo te an tel a ni. 

Indian National Trust For Art and Cultural Heritage (INTACH) Mizoram chapter hi Mizorama pipute sulhnu leh heritage humhalh tura kum 1983 a din a ni a. INTACH hi India ram States hrang hrang leh District hrang 150 chuangah din a ni tawh a ni.