1843/2023-2024

Lawngtlai dated 12th September 2023: Vawiin chawhma khan DC Conference Hall, Lawngtlaiah Sawrkar laipui ruahmanna a Chief Medical Office kaltlang a mipui dam rei tur a hriselna tih hmasawnna beihpui thlakna tur ‘Ayushman Bhavan Campaign’ kalpui dan tur relin thutkhawmna neih a ni a. Pu H.Lalhmingthanga, Deputy Commissioner chuan hun kaihruaiin Dr. S. Thaizi, District Nodal Officer, National Health Mission, Lawngtlai district chuan Campaign kalpui dan tur tlangpui sawi zauna hun a hmang bawk a ni.

Hun kaihruaitu Pu H.Lalhmingthanga, Deputy Commissioner chuan Committee member-te lawmna thu sawiin Lawngtlai district mipuite hriselna tih hmasawnna tur a thutkhawmna a nih angin vawiin thutkhawmna hian a tum ang ngei a mipui hriselna ah awmze nei a hmasawnna a thlen ngei a duh thu a sawi a. Campaign kalpui tur a member ruatte chuan an hma zawn a mawhphurhna awm te chu thahnemngai tak a hlen chhuak ngei turin a chah bawk a ni.

Dr. S.Thaizi, District Nodal Officer chuan ‘Ayushman Bhavan Campaign’ kalpui chhung hian Lawngtlai district-ah chuan inkaichhawn theih loh natna ‘Non-Communicable Diseases’ dap chhuah leh enkawl hna ngaih pawimawh a nih tur thu leh khawsak harsa zawkte tan Sawrkar laipui ruahmanna a hriselna inenkawlna senso engemaw chen phuhruk theihna ‘Pradhan Mantri – Jan Arogya Yojana’ chungchang inzirtirna leh inziahluhna hun thawl kalpui tum a nih thu a tarlang bawk a ni.

‘Ayushman Bhavan Campaign’ hi India ram pum ah President-in ni 13, September chhun dar 12-a a tlangzarh hnu ah Lawngtlai district-ah chuan CMO Conference Hall-ah Deputy Commissioner-in Campaign hawnna hun a hmang ang a. Ni 16th September hian Lawngtlai district chhung a Health & Wellness Centre 28-ah Health Mela kalpui a ni ang. September ni 18 leh ni 25 bak ah October ni 2 hian Bazar, Electric leh Council Veng ah PM-JAY a inziahluhna hun buatsaih tum a ni a, September ni 22, ni 29 leh October ni 6 hian Health Mela kaltlangin TB leh Malaria Screening-te, inkaichhawn theih loh natna vei leh vei loh endik te leh nu naupai hriselna endik te kalpui tur a ruahman a ni. Campaign chhung hian Blood Donation Camp buatsaih te, Organ Donation Canpaign kalpui te leh District Hospital tih fai hnatlangpui neih tum a nih thu thutkhawmna ah hian ngaihthlak a ni bawk.

Vawiin thutkhawmnaah hian SDO(Sadar), District Medical Superintendent, District Information & Public Relations Officer, District Program Officer, Lawngtlai khaw chhung VCP, President MJA, CYLA, MHIP, LWA leh Association for Voluntary Blood Donation hruaitute an tel a ni.