2767/2023-2024

Lawngtlai dated 9th November 2023: MLA Election 2023 chu Lawngtlai district-ah harsatna leh buaina lian tham awm lovin hlawhtling tak a kalpui a ni a. Lawngtlai district chhung a Polling Station 181-a duty-a kalchhuak, Polling Party-te pawh lo thleng kim tawhin vote tlak dan endikna, Post Poll Scrutiny-te pawh nimin khan neih zawh a ni tawh a ni.

Pu Joseph H.Lalramsanga, District Election Officer leh Deputy Commissioner ni bawk chuan Lawngtlai district chhung a 36-Tuichawng, 37-Lawngtlai West leh 38-Lawngtlai East Assembly Constituency-a mipui aiawh tur thlan chhuahna, MLA Election 2023 hlawhtling tak a kalpui a ni chu lawmawm a tih thu sawiin thawh hona tha tak a awm vang a nih thu a sawi.

District Election Officer chuan November ni 5 zan a Jarulsury Polling station pan a kal chhuah lirthei chetsualna thleng chu pawi a tih thu leh he chetsualna a nunna chan Pu Z.Lalmuanzuala, Constable, 4th IR Bn te chhung a tawrhpui thu sawiin Sawrkar atang a tih tur hrang hrang awm te chu bawhzui zel a nih thu a sawi.

Inthlanna felfai leh langtlang kalpui a nih theih nana chanvo hrang hrang a mawhphurtu Nodal Officer-te, Master Trainer-te, Sector Magistrate, Presiding Officer leh Polling Officer-te chung ah DC chuan lawmthu sawiin Lawngtlai district chhung a Polling Station thenkhatte chu inkalpawh leh inbiakpawhna kawng ah District dangte aia hnufual zawk nichung si a, hneh tak a an mawhphurhna an hlenchhuahna chuan an inpekna leh an mahni hna chanpual theuh a an rintlak zia a tih lan thu a sawi bawk a ni.

Venhimna kawng a Polling Party leh mipuite thlanmuantu, Polling Station tin a Police personal duty-te leh Network chhiatna hmun a inbiakpawhna khaihlak miah lova viltu MPRO-te hnathawh dan chu fakawm a tih thu Pu Joseph H.Lalramsanga chuan sawiin Polling party-te lo dawngsawng a, an mamawh hrang hrang a hmun a ngaihven saktu BLO-te leh lirthei khalhtute chung ah lawmthu a sawi.

Deputy Commissioner Office-a hmun nghaktu, Returning Officer, Assistant Returning Officer, Election Officer leh a staff-ten ruahmanna felfai tak an siam dan ahte, a tul ang ang bawhzui a che chhuak thin DC Office-a thawktute chung ah District Election Officer chuan lawmthu sawiin inthlanna hlawhtling tak a kalpui a nih theih nana Political party hrang hrang hruaitute thuawihna leh Tlawmngai pawl hruaitute telpui thinna ah lawmthu a sawi a, vote thlak ngai pawimawh tur a Kohhran kaltlang a mipuite hnen a ngenna siam bawhzuina kawng a Kohhran hruaitute hmalakna ah lawmthu a sawi bawk a ni. Mipui aiawh a rorel tur thlan chhuahna kawng a hriattur pawimawh hrang hrang puanzarna kawng ah MJA-te hmalakna lawmawm a tih thu sawiin India danpuiin duhthlanna chanvo min pekte ngai pawimawh a, a tak a ti lang chhuaktu, Lawngtlai district chhung a vote thlak zawng zawngte chung ah District Election Officer chuan lawmthu a sawi bawk a ni.