Vawiin hian Lawngtlai District ah naupang kum khat hnuai lamte pek tur vaccine thar Pentavalent chu hman tan a ni a, a hawnna inkhawm Council Veng Anganwadi ah neih niin Pi Vanlalhruaii, President Lai Women Association chu khuallian a ni a, Chief Medical Officer Dr. HC Thangkima leh Dr. Zothanpari Chhakchhuak District Immunization Officer ten damdawi thar chungchang hrilhfiahna an nei bawk.
Pentavalent Vaccine ah hian Vaccine panga (5) an awm khawm a, chungte chu Diptheria, Pertussis, Tetanus(DPT), Hepatitis B leh Haemophilus Influenza Type b (Hib) te an ni. Kan hman laiah hian DPT leh Hepatitis B hi chu a awm sa a, chutah chuan Hib Vaccine hi telh belh niin Vaccine hrang theuh pathum, (DPT, Hep B leh Hib) vawi thum injection ngai, la kim tura nausen a vawi kua ngawt thun ngai thin kha vawi khat injection a fel mai thei turin an rawn siam ta a, chu chu Pentavalent Vaccine thar hi a lo ni ta a ni.
DPT leh Hepatitis B bakah Hib telh belh hi a tul em em thin a, naupang kum 1 hnuai lam thihna chhan tam tak Meningitis zawng zawng 30-40% hi Hib venna neih loh vanga ngaih a ni. Pneumonia vanga thihna 10-30% vel pawh hi Hib venna awm loh vang nia hriat a ni bawk. Tin, Scepticemia, Osteomyelitis, Septic Arthritis leh Epiglottitis te pawh hi Hib Vaccine hian a veng thei dawn bawk a ni. Hib vanga natna te hi naupang kum 5 hnuai lamten an vei awlsam bik a, kum khat hnuailam ten an tuar na bik thin bawk. Chuvang chuan Pentavalent Vaccine hi naupang kum khat hnuai lamte lak tura tih a ni a, duhthusamah chuan thla khat leh a chanve an nihin pek tur a ni.
He vaccine hi India sawrkar chuan kum 2012 atang khan State hrang hrangah a tahtawla hman chhoh dan tur a duang a, kum 2014 thleng khan State leh UT 20 ah hman tawh niin a dang 16 te chu kumin a hmang tan turin a ti a. Mizoramah chuan kumin October atanga tan tura tih a ni a, vawiinah hian Lawngtlai bakah Kolasib, Serchhip leh Champhai District ten an hmang tan ve dawn a ni.
Lawngtlai District hmun hrang hrangah vawiin atang hian pek chhuah a ni dawn a, a man a to avangin renchem tak leh riral awm lo thei tur bera ruahmanna siam leh thawktute pawh zirtir an ni. He damdawi man atan hian sawrkar chuan naupang pakhat tana Rs 130 zel seng ral ang vel a ni dawn a ni.
