Mihring nunna atan hlauhawm thei natna chi hrang panga laka vaccine pakhata indanna, nausen pek tur Pentavalent Vaccine chu vawiin chawhma khan Champhai CMO Office-ah Champhai Addl. DC Pu C. Lalzarliana chuan Champhai District tan a tlangzarh. He hunah hian Sorkar Office hotu thenkhat leh tlawmngai pawl hrang hrang hotute bakah Kohhran atangte leh Health Worker-te an tel a ni.

Vawiin hun hi Pu C. Zirliana, CMO Champhai chuan kaihruaiin, hri thalo inkaichhawn theih leh kaichhawntheihloh te laka mihring him nan Sorkar laipuiin ruahmanna tha tak tak a siam chhoh zel thu a sawi a. Health Department lam a thawk te chuan thahnem ngai taka heng programme hrang hrangte hi tihlawhtling turin nasa taka an thawh thu sawiin, chutih kara thawktute zingah hna nei lo anga inngai an lo awm palh a nih chuan insiam that a tul thu a sawilang bawk.

Pentavalent Vaccine tlangzarh a nih hma hian Dr. R. Lianmawia, SMO leh DIO ni bawk hnen atangin he programme chungchang hrilhfiahna ngaihthlak a ni a. Tum khat inchiuna a natna chi 5 (diphtheria, pertussis, tetanus, hepatitis B leh Haemophilus influenzae type B) laka invenna tur Pentavalent Vaccination Programme hi a a hmaa IPV lo kalpui thin tawh bakah Haemophilus Influenzae Type-B (HIB) belh anih thu a sawi a. Haemophilus Influenza laka indanna damdawi hi a hma chuan private hospital-ah te man tam tak chawiin a lak theih thin a. He natna hri hian taksa harsatna hrang hrang khirh tak tak a thlen zingah meningitis leh septicaemia te a tel a, chuvang chuan nausen tet laia hri danna lak a pawimawh hle a. Tunah chuan Sorkar hmalakna in awlsam taka heng natnahri lakah hian indanna chhawpchhuah a ni hi a hlutna hre tlang ila, tiin Dr. R. Lianmawia chuan hri danna lak chungchanga insawithaihna awm thin chu thil duhawmlo tak leh vaccine a pawimawhzia inhrilhhriat zau zawk chu a tul thu a tarlang a ni.

Pu C. Lalzarliana, Addl DC chuan nausen hri danna pek kawnga hma thar kan chuang chu lawmawm a tih thu leh, nausen thi (Infant Mortality Rate) a tlak hniam phah a beisei thu a sawi a. Tun dinhmunah pawh IMR rate chu Champhai District-ah a tlahniam chho zel a, hei hi Health Department thawktute thwhrimna rah kan hmuhna pawh a ni, a ti a. Vawiin hri danna kawnga hmalakna thar tlangzarh pawh mipuiin kan hlut a, kan chhawr tlan ngei theih nan thawktute chu tlawmngai taka thawk zel turin a chah bawk a ni.

Pentavalent Vaccination hi nausen kum 1 hnuai lamah OPV rualin pek tur a ni a. Nausen chu kar 6 a tlin in 1st dose hi chiu a ni a. Dose hnihna hi kar 10 an tlin in pek leh niin, dose thumna leh hnuhnung ber chu kar 14 an tlin in pek tur a ni a. He vaccine hi bur (vial) khat hi vawi 10 chiu daih a ni a, hman tan a nih atanga ni 28 thleng dah that chuan a hman tlak a ni. Champhai District chhunga Health Supervisor leh Health Worker-te tan Pentavalent Vaccine chungchang hi September ni 2, 2015 khan zirtirna lo neih tawh a ni.