Vawiin a Mizoram Inthlanpui vote thlak chu Lawngtlai District ah pawh tluang taka neih zawh a ni a, tlai lam dar thum thlenga report dawn theih china lan danin vote thlak zat chu 31453 a ni a, report dawn theihloh tam tham tak a awm avang leh Vote thlakna khawl Lawngtlai lam rawn pan pui mek engemaw zat an awm tawh avangin vote thlak hun tawpa vote tla zat hi hriat chian theih a ni rih lo a ni.

Tarlan tawh thin angin Lawngtlai District chhungah hian Assembly Constituency pathum 36 Tuichawng, 37 Lawngtlai West leh 38 Lawngtlai East te an awm a, heng bial pathumah te hian Polling Station 159 zet awmin heng polling station zawng zawnga vote thlak thei awm zat chu 70437 a ni a, Tuichawng bial bikah hian vote thlak thei mi 26268 awmin he bial hi Mizoram chhunga vote awm tamna ber bial nia hriat a ni bawk.

Report dawn theih chin chin atanga a lan danin Lawngtlai District chhungah vote a tla tha thawkhat hle a hriat a ni a, 37 Lawngtlai West bial chhunga Darnamtlang Polling Station ah phei chuan chawhma dar 11:00 Am khan vote tla thei zawng zawng a tla kim ni a hriat a ni a, he bial chhunga mi tho Fangfarlui Polling Station, Laitlang P/S leh Chikhurlui P/Ste  pawh chawhnu dar 1:00 Pm khan vote tla thei zawng zawng tla kimin Polling Booth khar fel ni a hriat a ni bawk. Hetiang bawk hian Tuichawng biala Ugudasury N Polling Station pawh  tlai lam dar 3:00 Pm khan vote tla thei zawng zawng a tla fel nia hriat a ni bawk a ni.

Vawiin a vote thlak chhung hian buaina leh harsatna lian tham thawm hriat tur a awm lo va, Lawngtlai khawpui chhung Polling Station pakhat a vote thlakna khawl battery chu a down deuh avangin chawhnu dar 1:00 Pm vel khan thlak a ni a, hei bak harsatna dang sawi tur awm hriat a ni lo a ni.

Tunah hian Polling Party te hian Lawngtlai lam an  pan mek  a, District Election Office ah District Election Officer leh Officer dang ten an lo nghak mekin, heng Polling Party  haw mekte fel fai tak a dawn sawn an nih theih nan ruahmanna pawh tha taka siam fel a ni tawh a ni.