Lawngtlai District Anti Tobacco Squad (ATS) chu nimin (23.5.2017) khan Lawngtlai DC Conference Hall-ah an thu khawm. 

He thut khawm hi Lawngtlai SDO (Sadar) Pi Rochuangkimi Khenglawt MCS chuan a kaihruai a. Kal khawmte lawmna thu leh thu ngaihtuah tur te sawiin, member-te inhmel hriattirna hun hman nghal a ni. Hemi zawh hian National Tobacco Control Programme (NTCP) hnuaia Lawngtlai District Consultant Dr Christine Chhuanmawii chuan Lawngtlai District-a NTCP hma lak tawh dan leh hma chhawpte a sawi a. NTCP Social Worker Pi Lalnunthari’n vaihlo kaihhnawih khuahkhirhna dan (COTPA) chungchang a sawi bawk. 

He thut khawmah hian May ni 31, 2017-a World No Tobacco Day hman dan tur te, Lawngtlai District chhunga khaw tam thei ang ber vaihlo leh a kaihhnawih laka inthiar fihlim khua (tobacco free village)-a puan a nih theih dan tur te leh ATS hma lak zelna atana thil tul dang dang te sawi ho a ni a. NTCP Lawngtlai District Nodal Officer Dr S. Thaizi chuan lawm thu sawiin, hun khar a ni. 

NTCP hi nikum khan Lawngtlai District-ah lo lutin, Lawngtlai District Tobacco Control Cell (DTCC) chu March ni 17, 2016 khan hawn a ni a. District Hospital-ah Tobacco Cessation Clinic hawn a ni bawk. NTCP hnuaia hma lakna peng pakhat atan ATS hi din a ni a, hna hrang hrang thawk leh pawl hrang hrang ai awhte member-ah awmin, a nihna ang taka vaihlo leh a kaihhnawih khuahkhirhna dan (COTPA) hman a nih theih nan squad drive neih thin a ni. 

Kumin April thla tir atanga tun thleng hian Lawngtlai District ATS drive hi tum 4 neih tawh niin, dan phal lohva vaihlo leh a kaihhnawih zawrh cheng singruk chuang hu man a ni tawh.