Sawrkar chuan thupek chhuah in silai chi hrang hrang kawltu leh neitu te chu an awmna District Bawrhsap/Magistrate in huntiam a pek chhunga silai licence nei hman vek turin a hriattir a. Licence nen chauh a kawl theih silai te hian Airgun-ah calibre .177 leh a aia lian zawng zawng, tualchher silai zawng zawng, Pistol, ulhbun leh puakthei silaimu hmang zawng zawng te bakah battery hmanga hmehpuah theih chi silai te pawh a huam tel vek a ni.
Mizoram Rifle Association leh an hnuaia club inthlung te tih loh, silai neitu zawng zawng te chuan an awmna District Magistrate in huntiam a pek chhhung ngeiin an awmna bial emaw an awmna atanga hnaiber chhunga BDO/SDO(Civil) emaw District Magistrate hnenah an silai kenga inlan tur leh inhriattir vek tur an ni a. Thupek zawmlo te chu Arms Act, 1959 leh Arms Rules, 2016 tlawhchhan a hrem theih an ni ang. Tin, Arms Act, 1959 leh Arms Rules, 2016 in thuneihna a pek, thuneitu te hnen atanga licence nei chiah in airgun te pawh an hralh thei tawh ang.
Silai Licence hi traning hlawhtling taka paltlang hnuah Rule 39 of Arms Rules, 2016 hmanga sawrkarin Accredited Trainer atana a puan te hnen atangin Form S - 1 angin neih theih a ni ang a. District 8-a accredited Trainer te chu - Aizawl District tan Armourer, 1st Bn.MAP leh Armourer, 3rd Bn.MAP, Lunglei District tan Armourer, 2nd Bn.MAP, Saiha District tan Post Commander, 2nd Bn.MAP deployed at Saiha, Kolasib District tan, Armourer, 1st IR Bn. Mualvum, Mamit District tan Armourer, 4th IR Bn, Luangpawl, Serchhip District tan Armourer, PTS, Thenzawl, Lawngtlai District tan Post Commander 2nd Bn.MAP Deployed at Lawngtlai leh Champhai District tan Armourer, 2nd IR Bn., Khawzawl te an ni.
Arm Licence neih dilna District Bawrhsap te hnena thehluh zawng zawng te chu Commandant, Armed Unit hnenah ah thehluh leh a ni ang a. Saiha leh Lawngtlai bikah chuan Superintendant of Police hnenah Bawrhsap Pisa te chuan an thehlut thung ang. Commandant leh Superintendant of Police te chuan Arm Licence dilna chu lo endik leh in training dan tur, training na hmun tur leh thil tuldang te an lo buaipui zui ang.
