Nimin (30.07.2019) khan Lawngtlai District-a Bualpui NG khuaah Agricultural Technology Management Agency (ATMA) leh Krishi Vigyan Kendra (KVK), Lawngtlai te tang kawp chuan thlai chingtute nena thlai chin dan leh enkawl dan zir hona hun (farmers-scientists interaction) an buatsaih.

He hunah hian KVK Lawngtlai-a Senior Scientist & Head Dr C. Lafakawma, ATMA Project Director Pu Lalrambuatsaiha leh KVK Lawngtlai-a Scientist (Agronomy) Pu C. Rualthankhuma te'n zirtirna an pe a. Kut hna thawktute hi a thua zirtir an nih bakah, an huanah kal chilhin an thil zirte tih chhinpui an ni bawk.

Bualpui NG hi Phawngpui tlang bul hnaia awm niin, kum tluanin thlai chi hrang hrang an ching thin a. Fur zikhlum pawh hlawhtling taka chingin, Mizoram hmun dangah te thawn chhuah a ni thin a. Agriculture kaihhnawih line department hrang hrang - Agriculture, Horticulture, etc. leh an hnuaia Centre leh Cell - KVK leh ATMA ang te hian he'ng laia kut hna thawktute hi training hrang hrang pein, anmahni puiin an vil ve reng bawk a ni.