Vawiin khan Rubber & Allied Crops Development Board chu Chief Minister Pu Zoramthanga hovin CM Cabinet Meeting Room ah board hmalak dan tur sawiin an thukhawm. He board ah hian Chairman chu Land Resource, Soil & Water Conservation Minister Pu R. Lalzirliana niin, Pu Lalrinsanga Ralte, Serlui bialtu MLA chu Vice Chairman a ni.

Chief Minister chuan Rubber & Allied Crops Development Board chuan a hmalakna hnuaiah sum a chantir theih thing leh theirah chi hrang hrang zau taka a huam theih thu sawiin, Board chuan zirchian hmasak ngai te zirchiang in, a kal zelna turah pawh uluk tak leh duhsak bik neilo a kal tur a nih thu a sawi a. Board chu ruahmanna siam a society te nen thawkho in, kawng kawhhmuhtu leh remchanna siamtu dinhmunah a din tur thu leh kuthnathawktute hmakhua chu ngaihpawimawh hmasak ber a nih tur thu a sawi.

Vawiin meeting-ah hian rubber, coffee, hmunphiah, kuhva leh a dangte chu a that theihna tur hmun te enfiah a area ang zawnga then a pawimawh hmasak thu sawi a ni a. Rubber chu low altitude ngeih a nih avangin, hmun sang zawk (high altitude) ah chuan a kung lian tha mahse chuanhnuai lam rubber kungte aiin hnai a chhuah tlemin a hlawk tak tak theihloh thu sawi a ni. Board Chairman Pu R. Lalzirliana chuan thenawm state Tripura chuan rubber atanga an sum lakluhin an economy a tanpui nasat thu a sawi a. Mithiamten an zirnaah Tripura rubber aiin Mizorama rubber kan neih mekte chu a hnai a hlawk zawk tih an hmuhchhuah leh zel chuan rubber chin hlawkzia a lantir thu a sawi. Tun dinhmunah rubber ching chhungkaw 1300 bawr vel awm niin Mizoram Rubber Plantation Association chuan chhinchhiah in, an rubber kung neih belhkhawm chu kung nuai 11 bawr vel tura chhut a ni a. Chung zingah chuan kung nuai 6 chuang chu kumin hian hnai theih beiseiawm a ni.

Board hmalaknaah hian plantation area tur fel taka duan bakah link road siam te, a chi/tiak tha thei ang ber lak dan tur te, theihna lai apianga mixed-cropping kalpui te leh sawrkar laipui a board dinglai te nen a indawr chungchang te vawiin hian sawiho a ni.

Vawiin meeting-ah hian State Planning Board Vice Chairman Pu H. Rammawi, Adviser to CM Pu C. Lalramzauva leh member dangte an tel kim hle a ni.