No.281/2021-2022

Lawngtlai, Tau thla ni 26, 2021: Tun hnaia Lawngtlai District chhung hmun eng emaw zata kangmei chhuak chungchangah vawiin khan Lawngtlai Bawrhsap, District Disaster Management Authority (DDMA) Chairman ni bawk Dr Andrew H. Vanlaldika chuan a pisaah Lawngtlaia thu thar la khawmtute a kawm.

Lawngtlai Bawrhsap Dr Andrew H. Vanlaldika chuan Lawngtlai District chhung hmun eng emaw zata kangmei chhuak chungchangah khaw hrang hranga mipui inpekna avangin vanduaina lian zawk a thleng rih lo tih sawiin, Central YLA, Branch YLA, Village Council leh pawl hrang hrangte inpekna chu hlu a tih thu a sawi a. Kangmei chhuak hi Lawngtlai District Disaster Management Authority chuan uluk taka a vil thu leh bialtu Block Development Officer te'n thut chilh a, a tul anga hma an lak zel thu sawiin, Bawrhsap chuan Lai Autonomous District Council (LADC) thuneitute leh official-te, state leh LADC hnuaia Environment, Forest & Climate Change (EF&CC) Department te, Fire Department te, DDMA hnuaia Quick Response Team leh VC leh tlawmngai pawl te'n theih tawp an chhuahnaah lawm thu a sawi a. Tun dinhmunah kangmei chhuak hi theih tawp chhuaha thelh mek niin, boruak duhawm lo a thleng thut a nih loh chuan mipui tan a hlauhthawnawm lo tih sawiin, Phawngpui National Park pawh ngun taka ven niin, kangmei lakah venhim theih zel a la ni rih tih a sawi.

Vanduaithlak takin Bungtlang 'S' khaw rama kangmei chhuak chuan April ni 25, 2021 khan khaw chhung kang kaiin, in 12 kang ralin, in 2 dang chu a then a kang chhe tel bawk a. Hemi chungchangah hian kangmei chhuak chu thelh mih a nih tawh thu sawiin, Bawrhsap chuan kangmei tuarte chhawmdawl nan pawh a theih chin chinah hma lak nghal a nih thu a sawi bawk.

Bawrhsap chuan Lawngtlai District chhung hmun hrang hranga kangmei chhuak chungchangah hian state sawrkar thuneitute'n theih tawpa ngaihtuahna an rawn senpui thu sawiin, a bik takin EF&CC Minister Pu TJ Lalnuntluanga, Tourism Minister Pu Robert Romawia Royte, Lawngtlai East bialtu MLA Pu H. Biakzaua leh Lawngtlai West bialtu MLA Pu C. Ngunlianchunga te'n theih tawp chhuaha hma an lak thu a sawi a ni.

Lawngtlai Bawrhsap chuan COVID-19 hri leng vanga ram a buai mek laia Lawngtlai District bakah Mizoram hmun hrang hranga kangmei chhuak chu pawi a tih thu leh a tuartu zawng zawngte a tuarpui thu a sawi a. District chhunga chhiatna (disaster) a thlen changa thu rin tlak tak chhawp chhuak thintu leh tha taka District Administration thawhpui thintu Lawngtlaia journalist-te chungah lawm thu sawiin, kangmei chu mihringte mai bakah, ramngaw leh nungchate tana chhiatna nasa tak thlen thei a nih avangin kangmei tichhuak lo tura fimkhur turin District mipuite a chah bawk.

Lawngtlai DDMA-in report a dawn chin atanga a lan danin, hriat theih chinah tun hnai khan Lawngtlai District chhunga hmun 16-ah kangmei hi a chhuak a. Kangmei chhuak hian thil pawi lian zawk a thlen loh nan theih tawp chhuaha ven mek a ni hlawm.

Kangmei chhuak avang hian Lawngtlai khawpui leh District chhung hmun eng emaw zat chu meikhuin a bawh nasa hle a. Lawngtlaia Health Department hotute chuan mipuite chu pawn chhuak tam lo tura ngenin, meikhu bawlhhlawh an hip luh loh nan ngun zawka hmai tuam tur leh in chhungah boruak tiche vel reng thei tur, electric fan leh hmanraw dang hmang uar turin an chah a ni.

Hriat theih china Lawngtlai District chhunga kangmei chhuahna hmunte chu:

1. Sangau-II
2. Cheural
3. Lungtian
4. Sangau-IV
5. Lungpher South
6. Thingkah
7. Mampui
8. Bungtlang South
9. Vathuampui
10. M. Kawnpui
11. Chawnhu
12. Hruitezawl
13. Ngengpuikai
14. Tuithumhnar
15. Sabualtlang
16. Ngengpuitlang

te an ni a. Kangmei chhuah chhan leh kangmeiin chhiatna a thlen dan hi District thuneitute chuan uluk takin an chhui mek a. A tul angin hma an la reng bawk a ni.