No.627/2021-2022

Lawngtlai, Tomir thla ni 21, 2021: Vawiin khan Lawngtlai DC Conference Hall-ah Bawrhsap Dr Andrew H. Vanlaldika hovin Lawngtlai District chhunga total lockdown kalpui mek dan thlir ho a ni.

He hunah hian Lawngtlai District Administration, Police, Medical leh I&PR lama thawktute, Zonal Officer-te, Lawngtlai khawpui chhunga VLTF ai awhte, CYLA leh MJA lam ai awhte an tel a. COVID-19 hri leng dona atana Mizoram sawrkarin state puma inkharkhip bur (total lockdown) a puan bawhzuia Lawngtlai District chhung, a bik takin Lawngtlai khawpui chhunga hma lak mek dan thlir ho niin, tan lak thar ngaihna lai leh hmachhawp atana rawtna te sawi ho a ni.

Bawrhsap Dr Andrew H. Vanlaldika chuan COVID-19 hri leng thawh hnihna lo hluar thar lehah Mizoramah lockdown thawh thumna kalpui mek a ni a, Lawngtlai District-ah pawh Police, Executive Duty leh VLTF-te tan hona leh District mipuite thu awihna azarah hlawhtling takin kalpui a ni tiin, lawmawm a tih thu a sawi a. Quarantine, test, contact tracing, positive enkawl leh hri danna (vaccine) pek chungchangah te Medical lamin hah taka hna an thawh thu leh an inpekna azarah Lawngtlai District dinhmun pawh a duhawm thawkhat hle thu te, VLTF leh tlawmngai pawlte'n kawng hrang hrangah Medical lam leh sawrkar kutke dangte an thawhpui thin thu te, vaccine pek chungchangah Lai Autonomous District Council-in Medical lam an tanpui bakah, Chawngtea Covid Care Centre enkawl chungchangah Chakma Autonomous District Council te'n puihbawmna an pek thu te leh Lawngtlai District-in hri leng a dona kawngah journalist-te thawhpuina leh thlawpna a that thu te tar langin, lawm thu a sawi a. Sawrkar department hrang hrang, pawl leh mimal te thahnem ngai taka tan hona azarah Lawngtlai District chu tuna a thlen chin thleng thei a nih thu sawiin, ram tan a nih piah lamah, mahni tan a ni tel tih hre renga theih tawp chhuah deuh deuh tur leh, hri leng dona leh hri leng laka him nana sawrkarin inkhuahkhirhna a zam leh inkaihhruaina a duante chu tha taka zawm turin District mipuite chu a chah a ni.

Lockdown kalpui mek avanga chhungkaw harsatna tawkte puihna atan Chief Minister's Relief Fund for COVID-19 atangin Lawngtlai District chuan tun hnai khan Rs 2,50,000/- (nuai hnih sing nga) a dawn thu Bawrhsap chuan a tar lang a. Hri leng dona kawnga a tul apianga hman atan tun hnaiah District Level Task Force on COVID-19 kutah tanpuina sum, Zoram Drivers Union (ZDU), Sub-Headquarters Lawngtlai atangin Rs 5,000/- (sang nga) leh Ngurnunsangi English School Alumni (NESA) atangin Rs 1,00,000/- (nuai khat) dawn a nih thu a tar lang bawk.

Attachment

  • Loading attachment...