No.628/2021-2022 

Aizawl 21st May 2021: Vawiin khan Aizawl DC Dr Lalhriatzuali Ralte kaihhruaina hnuaiah Commerce & Industries Minister hova meeting-in a lo rel tawh bawhzui tura ruat, sa leh thlai man bithliahtu tur Committee chu Aizawl DC pisaah an thukhawm. Vawiina Committee in sa leh thlai man a bithliah hi Aizawl Municipal Corporation huamchhunga karleh bazarni hmasa ber 25.05.21 (Thawhlehni) atanga hman tan nghal tum a ni.

COVID19 a darh zel lohna turin Aizawl Municipal Corporation area huamchhungah hun engemawchen lockdown puan a ni ta a. Hemi hun chhung hian sawrkar chuan mipui mimir te leh sumdawngte tan pawha lungdamna tur thlai leh sa man rualkhai zawka khawpui chhunga lei leh hralh chu tul a ti a. Chuvangin, vawiin meeting hian bazar rate, lei leh hralhna uluk taka buk leh zirchiang chungin ruahmanna a siam ta a ni. He ruahmanna hi Committee chuan AMC huamchhungah May ni 25 atangin June thla pum atan hman ni se, a ti bawk.  

Veng tina bazarah thlai leh sa man bithliah anga zawrh a nih leh nih loh chungchangah Local Council te chu thuneihna pek an ni ang a. Local Council te hian a tul angin Local Level Task Force (LLTF) te thahrui an hmang tangkai thei ang. Dan bawhchhiate chunga hremna lekkawh chu Local Council te kutah dah a ni a. Local Council te bakah sa leh thlai man bithliah a zuartuten an zawm ngei em tih endik turin Commerce & Industries Department kaihhruaina hnuaiah line department heng - Agriculture, Horticulture, Fisheries, AH& Vety, Legal Metrology leh AMC atanga ruat mi pahnih theuhin Aizawl bazar te an fang kual thin dawn bawk a ni.