543/2025-2026

Lawngtlai, 10th May 2025 : Vawiin khan 'Lawngtlai District Civil Defence Advisory Committee' chuan DC Conference Hall- ah thutkhawm an nei a. Pu Cheemala Siva Gopal Reddy, IAS, Lawngtlai bawrhsap leh Chairman, Lawngtlai District Civil Defence Advisory Committee- nibawk chuan hun a kaihruai.

Pu Cheemala Siva Gopal Reddy chuan kalkhawmte hnena lawmthu sawina a nei hmasa a. Tun hnaia India leh Pakistan inkar boruak thlirin engpawh thleng thei a ni a, chutiang karah chuan mipuite him zawk nan Civil Defence Advisory Committee - ten tih tur leh ngaituah tur tam tak a nei a ni, a ti. A bik takin infrastructure pawimawh tak tak- School, Hospital, Community Hall, Helipad, Kohhran Biakin leh a dangte chu hmelma te beih hmasak a ni thei tih hriat a, engpawh thleng thei laka lo in ralrin a tul hle a ti. Bawrhsap chuan ei leh bar a khaihlak loh nan leh tuialhthei lama harsatna awm lo turin DCSO chu godown leh Petrol pump- te uluk taka endik turin a chah a. Internet leh mobile connection- lama harsatna awm lo turin, Airtel, BSNL leh Jio- te chu uluk zawka an tower vil tur leh power backup nei ngei ngei turin a chah bawk.

Bawrhsap chuan tui leh kawlphetha lama harsatna awm lo turin PHED leh P&E te chu theihtawp chhuah turin a chah a. Tlawmngai Pawl hrang hrang, VC, Kohhran leh Sawrkar department hrang hrangte inakarah thawhhona tha leh zual a awm a pawimawh hun a ni tih tarlangin, Bawhrsap chuan lungrual taka thawk ho turin a sawm a. Eng thil pawh thleng thei a ni tih hriaa mipuite chu chi ai mai lo tur leh district administration thuchhuak lo ngaichang fo thin turin a ngen a ni.

Pu Lokeshwaran R. IPS, Superintendent of Police, chuan mipuite thawhpuina sawmin, dan leh thupek kengkawhtute thu lo ngaichang thin turin a ngen a. A bik takin 'Foreigner' hmu leh hria an awm chuan Police Station- a lo report thin turin a chah nghal bawk.

Pi Margaret J. Vanalremmawii, SDO (S) chuan 'Civil Defence Action Plan'  siam mek a nih thu leh peihfel thuai  nih tur thu a tarlang a. A tul dan ang a  'Mock Drill' pawh neih a nih tur thu sawiin, mipuite pawhin thahnemngai taka lo tawiawm tur a sawm nghal a ni.

Vawiin thutkhawmah hian Lawngtlai District Civil Defence Advisory Committee Member-te an tel kim tha hle a, Pu Cheemala Siva Gopal Reddy, Deputy Commissioner, Lawngtlai chuan lawmthu sawina neiin hun a khar.