544/2025-2026

Siaha the 10th May 2025: Vawiin chawhma dar 11:30 khan DRRC Hall, DRDO Siaha-ah India leh Pakistan inkarah boruak muanawmlo a awm chhunzawm zel avanga inralrinnan District Bawrhsap Pu VL Hruaizela Khiangte kaihhruainain Siaha District chhunga Head of Office te, NGO hruaitute leh Kohhran hruaitute an thukhawm.

Thutkhawm kaihruaitu District Bawrhsap Pu VL Hruaizela Khiangte chuan tun hun chu tanrual hun a ni a, sawrkar official-te bakah NGO hrang hrangte leh mipuite thawhhona tha neih a tul hle, a ti. Siaha chu Ramri hrula awm a nih avangin inralring renga awm a ngai a, Sawrkar Laipui pawhin a ngai pawimawh takzet a, eng pawh thleng thei tura inbuatsaih a tul takzet tiin tha taka sawrkar thawhpui turin mipuite a ngen.  District Bawrhsap chuan Ministry of Home Affairs, Govt of India thupek bawhzuiin zanina Black out buatsaih turah Siaha Mipui tawiawmna a ngen a, Electricity Mai bakah Inverter leh solar light hmangte pawn timit vek a, minute 5 chhung thu awih taka awm theuh turin mipui a ngen a ni.

Siaha District SP Pu Manny Bhushan Singh, IPS pawhin mipuite chu thawhhopuiah a sawm a, hun khirh leh ralmuangloah awm mek mahila chiai mai lovin an mahni tawimawm tlat turin a sawm.

Major Sukhraj Singh, Company Commander, 20th Batallion Assam Rifles pawhin mipuite chu Sipai te thawhhopui tlat turin a chah a , Sawrkar Laipuiin venghimtu sipaite veivak leh che vel reng reng thlalak, video leh news anga vawrh darh a khap tlat tih tarlangin chutiang lakah mipuite inthiarfihlim tlat turin a ngen bawk a ni.

Vawiin thutkhawmah hian India leh Pakistan inkar boruak chhe mek avanga inrin reng a tul thu tarlan a ni a, Ministry of Home Affairs thuchhuak angin Siaha khawpui chhungah zanin dar 8:30-8:35 inkarah Black Out buatsaih ni se an ti a ni. He Black out hi tha taka zawm a nih theih nan Mipui hriatah a zau thei ang bera puan darh nise, pawl hrang hrangte bakah Kohhranahte puan ni se, magistrate leh thuneihtu ten mipuiiin an zawm that nan vil se tih a ni bawk. Heng bakah hian black out chhunga guidelines awm te tha taka zawm a nih theih nan social media platform hrang hrangah chhuah darh nise tih a ni bawk. Nitin mamawh ei leh in, tui, Eng, petrol leh adangte reserve a awm that thu tarlan a ni a, mipuite chu inlei khawl teuh lo turin leh chutiang taka a kal theih nan khauh taka thupek chhuah nise an ti bawk a ni.

Vawiin thutkhawmna hian Mizoram sawrkar official te, MADC aiawhte, Siaha a NGO pawl hrang hrang aiawhte leh Kohhran aiawhte an kalkhawm a ni.