545/2025-2026

Dated Kolasib the 10th May 2025: Vawiin khan Kolasib Deputy Commissioner Conference Hall-ah District Civil Defence plan chungchangah thutkhawmna pawimawh tak neih a ni a. He thutkhawmna hi Pu Robert C Lalhmangaiha , Deputy Commissioner (DC)- Kolasib in kaihruaiin sawm bik, Kolasib District chhunga sawrkar Department thenkhat aiawhte leh National agency thenkhatte leh khawtlang leh tlawmngai pawl aiawhte an tel thei a ni.

He hunah hian DC chuan vawiina meeting an neihna chhan te sawiin, District Civil Defence Action Plan duan chu India sawrkar leh State Sorkar in a ngai pawmawh em em a ni tiin, Kolasib chu Mizoram district zingah pawh Aizawl tih loh ah chuan second most critical District a nih thu a tarlang a. Nimin piah lawka Chief Secretary-in hemi chungchanga high-level meeting a koh hnuah district zawng zawngte chu an Achievement report thehlut tura hriattir an nih thu leh Kolasib district-pawh in an District chhunga infrastructure pawimawh tak tak list an theh luh tawh thu a tarlang bawk.

DC chuan heng an thil rel te ti hlawhtling tur chuan khawtlang hruaitute, NGO leh Kohhran hruaitute leh Sawrkar Department ten thawhhona tha tak an neih a pawimawh takzet a ni,a ti a. India leh Pakistan buaina chu hla viau angin lang mahse fimkhur leh inpeih renga an lo awm chu a pawimawh a ni a ti. Civil Defence Action plan chu National priority anih angin state priority a ni a,chu chu district priority a ni bawk ti a sawiin, an zavaia tangrual tur an nih thu uar takin a sawi a.  Sipai lamin an ngenna angin  mipuite social media a sipai che vel emaw ram venhimna kawnga sipai hmalakna thil danglam bik an hmuh te thehdarh mai lo turin a ngen a. Sawrkar thupek zawm leh ram venhimna kawnga sawrkar hmalaknate thlawp chu India mi tupawh in a an mawhphurhna  leh an tihmakmawh a ni, a ti.

Pu David H Lalthangliana, Kolasib District Superintendent of Police (SP) pawhin Civil Defence Action Plan pawimawhzia sawiin Civil Defense Act chu 1968 ah duan daih tawh nimahse hman lohvin rei tak a awm a, chu chu tun dinhmunah an hman a ngaih tak thu a sawi a."Kan ram hi a awmna hmun avang hian thlamuang takin a lang thei a, mahse hmalam hun tur sawi lawk theih a ni lova,  Chuvangin engtik lai pawha inbuatsaihna tha kan neih a pawimawh hle a ni," tia SP chuan sawiin,  Police-te'n himna leh muanna vawnhim tura an hmalaknate thlawp a thawhpui turin mipuite a ngen bawk.

Vawiin a thutkhawmna ahhian thurel pawimawh tak tak rel a ni , chungte chu: 

Control Rooms siam: District Emergency Operation Centre DM&R branch, Deputy Commissioner's Office a mi chu District Control Room ah hman a ni anga. Police stations hrang hrangte Subsidiary Control Room ah hman a ni bawk ang.

Civil Defence Action Plan duan: Deputy Commissioner Office in civil defence action plan a duang anga, department hrang hrangten hemi atana pawimawh tur hi an submit bawk ang.

District Transport Officer (DTO), Kolasib,in kolasib chhunga 05 registered lirthei zawng zawng list te a submit anga, hetah hian search and rescue atana pawimawh lirthei te ngaih pawimawh leh zual tur a ni.

Mock drill: Mock drill hi chi hnih in a awm anga chung te chu Air raid mock drill leh fire mock drill te an ni ang. Air raid mock drill hi Kolasib leh Vairengte ah 12.5.2025(monday) zan dar 9 atanga dar 9:04 chhungin neih a ni anga. Dar 8:59 ah siren a ri anga, dar 9 ah eng zawng zawng tih mih (total blackout) tur a ni. hei hian inverter, solar, bati etc a huam vek ang. motor pawh hemi hun chhung hian tlan loh tur a ni. Fire Mock Drill neih hun tur hi inhrilhhriat leh a ni ang.

VC, YMA leh kohhran hruaitute he mock drill a hlawhtlin theih nan hian thawhpui tura sawm niin, mipuite hnena thehdarh tura ngen an ni nghal bawk.

Vawiin thutkhawmna ah hian Kolasib District a hetiang hun atana tangkai zual tur a ngaih te sawm niin, Deputy Commissioner, Superintendent of Police, Additional Deputy Commissioner, Counter Insurgency and Jungle Warfare School (CIJW) Vairengte aiawh, National Highways and Infrastructure Development Corporation Limited (NHIDCL), Railways, North Eastern Electric Power Corporation Limited (NEEPCO) leh Mizofed aiawhte leh Kolasib District a sawrkar Office Head thenkhatte leh Village Councils hruaitute, NGO leh kohhran hruaitute thahnem tak an tel thei a ni.