1403/2026-2027

Lawngtlai 15th July 2026: Vawiin chawhnu  dar 1:00 PM khan DC's Conference Hall, Lawngtlai ah Pu Donny Lalruatsanga, Bawrhsap leh Chairman, District Disaster Management Authority (DDMA)  nibawk kaihhruaiin Lawngtlai District Disaster Management Authority - thutkhawmna neih a ni.

Pu Donny Lalruatsanga chuan fur ruahtlui tlain harsatna hrang hrang a thlen mek tih tarlangin, hemi kawngah hian chak zawka hmalak mek a ni, a ti a. A bik takin leimin vanga harsatna thlengah 'Zonal Officers',  Department leh Company lam ten theihtawp an chhuah thin tih a tarlang a. Nasa zawka ruah a la sur dawn avangin DDMA - te inralring renga awm a  tul hle tiin, chhiatna thleng thulha chechhuak thei turin a chah a ni. Chhiatna thleng thulhah 'Khuarel App' hman tangkai thiam a tul hle tiin, mahni awmna Zonal Officers- te pawh a hma lama hriattir thin turin khawtlang hruaitute leh mipuite a chah a. Bawrhsap chuan Lawngtlai mipuite tan DDMA - te an awm reng tih tarlangin, State Sawrkar, LADC leh NGOs- te inkarah thawhhona tha tak a awm tih sawiin, Lawngtlai mipuite tan theihtawp chhuah chhunzawm zel a nih tur thu a sawi bawk a ni.

Thutkhawmah hian hmalakna hrang hrang ngaihthlak a ni a. PWD Lawngtlai Division hnen atangin Town Area-ah tum- 40 lai leimin thenfai hna an thawh tawh thu ngaihthlak a ni a. Lawngtlai leh Sangau RD Block - BDO te hnen atangin leimin leh tuilian vanga chhiatna thleng hrang hrang leh an hmalaknate ngaihthlak a ni a. Report kimchang zawk siama DDMA lama thehluh a nih tur thu an sawi a ni. E.E (PHED) chuan ruahsur leh leimin vanga harsatna lian tham an tawh loh thu ngaihthlak niin, SDO (P&E) hnen atangin kawlphetha dinhmun tlangpui leh hmachhawp an neihte ngaihthlak a ni bawk.  20 Assam Rifles-atangin chhiatna thleng thulha an inrâlrin dan ngaihthlak a ni a, NHIDCL, ABCI leh PMPL-atangin kawngpui block a awma hmalakna an neihte bakah ruahmanna an siamte ngaihthlak a ni bawk.

Furpui hun bikah chhiatna thleng thei reng a nih angin DDMA te inralring renga awm ni se an ti a. Chhiatna thlengah Khawtlang hruaitute nen thawhho thiam a tul hle tih pawm tlangin, thahnemngai taka thawkho tura hmalak ni se an ti a. Chhiatna a thlenin, a rang thei ang bera hmalak ni se, hemi atan hian 'Zonal Officers' leh Concerned Department - ten a hmunah kalchilh thin ni se an ti bawk a ni.

Vawiin thutkhawmah hian DDMA Member- te an telkim tha hle a, Bawrhsap chuan chhiatna thlengah leh invenna kawngah hawhhona tha nei tura sawmin, lawmthu sawiin thutkhawm hi a khar.