1402/2026-2027

Lawngtlai, 15th July 2026: Vawiin khan DC  Conference Hall-ah 'Stand Up Lawngtlai (Tho Law Dir Tuah) thlirletna neih a ni a, Pu C. Ngunlianchunga,  Lawngtlai West bialtu MLA leh Patron nibawk leh Pu C. Lalsawmzuala, CEM, LADC- te chuan an telpui a. Lawngtlai bawrhsap Pu Donny Lalruatsanga chuan hun a kaihruai.

Pu C. Ngunlianchunga chuan kalkhawmte hnena lawmthu sawina a nei a. Lawngtlai khawpui hmasawnna tura bawrhsap hmalakna chhuanawm a tih thu tarlangin, thahnem ngai taka thawk zel turin duhsakna a hlan a. Tho Lo Dir Tuah - tha taka kalpui turin thawhhona tha tak a awm a tul hle a, midang tana harsatna siam lo a, huapzo hmasawnna ni tura kalpui zel a tul dawn hle a ti a. Tun dinhmunah District Administration leh LADC inkara thawhhona tha tak awm chu vawnnun zel a pawimawh hle tiin ram leh mipuite tan thawkho zel turin a fuih a. Lawngtlai khawpui in Faina leh thianghlimna, Traffic Management leh kawng  dang dangah rahbi thar a kai theihna tura theihtawp chhuah tura Lawngtlai mipuite sawmin, Pu C. Ngunlianchunga chuan hemi kawnga hmalakna atan hian sum leh pai a hlan nghal bawk a ni.

Pu C. Lalsawmzuala, CEM, LADC- chuan Lairam mipuite faina leh thianghlimna, lirthei enkawl kawngah leh Ruihhlo do kawngah neitu thinlungpua tan la thar turin a chah a. Tho Lo Dir Tuah - kaltlangin veng hrang hrangah hmasawnna hmuh tur a awm mek tih tarlangin, heihi chhunzawm zel a tul hle a ti a. Lawngtlai District - tan LADC sawrkar a ding tlat dawn tih sawiin, tun aia hmasawnna  tha zawk awm tura hmalak zel a nih tur thu a tarlang a ni.

Pu Donny Lalruatsanga chuan Lawngtlai khawpuiin kawng hrang hranga hmelthar hmua, hmasawnna tha zawk a neih theih nan 'Stand up Lawngtlai (Tho Law Dir Tuah) chu April ni 16, 2026 khan hawn a lo ni tawh thu a tarlang a. Lawngtlai chu khawpui nuam leh chhenfakawm zawk a siam tura theihtawp chhuah a nih tur thu sawiin, mipuite thawhpuiah a sawm  bawk.

Pu HC Vanlalruatpuia, (Transport Officer, LADC kalchhuakta)  chuan Lirthei dah dan felfai zawk awm turin LADC chuan ruahmanna siamin thupek chhuah a nih tawh thu a sawi a. Tun dinhmunah chhun lama Parking chu 80% tihfel tawh niin, zankhuaa kawngkama lirthei dahte chu 'Village Level Traffic Management Committee' hmalaknaa 'Parking Fee' khawn tawh niin, 'Parking leh No Parking' Signage -  pawh mumal taka tihfel tawh niin, a tarna hmun turah tar deuh vek tawh a nih thu a sawi. Pu C. Lawmsangzuala, Sanitation Officer, LADC chuan khawpui cheimawi tura hmalak tawhna  hrang hrang bakah 'MCC 2026 Key Points & Action Plan'  sawizauna a nei bawk a ni.

Thutkhawm chuan Faina leh thianghlimna, Parking leh Traffic Management - ah tun aia nasa zawka hmalak leh ni se an ti a. A bik takin Mizoram Cleanliness Competition 2026 - a dinhmun tha zawk hauh tura theihtawp chhuah ni se an ti a. Hemi atan hian Veng tin ten a tam thei ang bera Faina Hnatlang lo nei thin se an ti bawk a ni. Bethel Veng khawtlang hruaitute hnen atanga lehkha lut ngaihtuah niin, CYLA Playground - pan thlakna kawngah LMV (Private Vehicle) chin chhuk chhoh phal ni se an ti a ni.

Vawiin hun hmannaah hian "Stand Up Lawngtlai (Tho  Law Dir Tuah)" Member- te an tel kim tha hle a, Pu Donny Lalruatsanga chuan lawmthu sawiin hun a khar.