2771/2024-2025
Dated Lawngtlai, 30th October 2024: Mizoram sawrkara 'Disaster Management and Rehabilitation Department' thuchhuak bawhzuiin vawiin khan Lawngtlai District Disaster Management Authority chuan 'Mock Exercise on Floods and Landslides' neih dan tur rêla thutkhawm DC Office Chamber- ah an nei a. Pu Cheemala Siva Gopal Reddy, IAS, bawrhsap leh Chairman, Lawngtlai District Disaster Management Authority nibawk chuan thutkhawm hi a kaihruai.
Pu Cheemala Siva Gopal Reddy, IAS chuan Mizoramah ruahtui tla nasa in, tlâng ram a nih bawk avangin lei min leh chhiatna dang tam tak a thleng fo thin a ti a. Chhiatrupna (Disaster) lo thleng lakah nunna chân lo tur leh, thil tihchhiat a tam lohna turin inbuatsaihna tha a tul hle tih tarlangin, Mock Exercise neih turah theihtawp chhuah a tul tak zet a ti. District Disaster Management Plan- fel fai tak siam a nih tawh thu sawiin, Department zawng zawngah sem chhuah a ni dawn a, uluk taka lo zirchiang turin department hotute a chah.
Tlâwmngai Pâwl leh Volunteer- te pawimawhna sawiin Pu Cheemala Siva Gopal Reddy chuan chhiatna a lo thlenin, indaihlohna tam tak lak a chhawktu an ni a, chhawmdawl hna an thawk tha thin hle a, an fakawm tak zet a ti a. Khuarel chhiatna a lo thlenin, mimal, sawrkar department emaw pawl pakhat kutah engkim dah theih a ni lo a, thawhhona leh tanhona tha a ngai hle tih tarlangin, thawhhona tha nei tura theihtawp chhuah turin a sawm a. Chanchinthar thehdarhtute pawhin mawhphurhna lian tak an nei tih sawiin bawrhsap chuan khuarel chhiatna lo thleng laia awm dan tur bakah chhiatna lo thleng thin chungchanga mipuite hriattur pawimawh thehdarh kawngah thahnem ngai taka thawk zel turin a sawm. Pu Cheemala Siva Gopal Reddy chuan Khuarel chhiatna a lo thlenin, chi âi mai lo va, tih tur leh tih loh turte uluk taka zawm thin turin Lawngtlai mipuite a sawm bawk.
Thutkhawmah hian 'Mock Exercise on Floods and Landslides' kalpui dan tur tlangpui sawiho a ni a. Mock Exercise- neihna tur atan Kaladan Multi-Modal Transit Transport Project (KMMTTP) kawngpui leh Kamalanagar (CADC) thlan a ni a, Mock Exercise endiktu ( Observer) atan Commandant, 3rd IR Battalion, Thingkah ruat a ni bawk. Mock Exercise neih tur atan hian Line Department hrang hrangte hna chanpual fel fai tak siam a ni a, mahni hna chanpual theuh tihhlawhtling tura hmalak theuh ni se an ti a. DIPRO, Lawngtlai chu 'Mock Exercise' neih lai thlalak leh video buaipui tura ruat a ni a. Mock Exercise on Floods and Landslides - hi November ni 14- a neih tura ruahman niin, hemi hma ni hian enlâwkna (rehearsal) neih ni se an ti, a ni.
Vawiin Lawngtlai District Disaster Management Authority thutkhawmah hian Member - te bakah sawm bik- Commandant, 3rd IR Battalion, DIPRO, District Organiser (DDMA) leh CYLA aiawh an tel thei a ni.
