2770/2024-2025

Dungtlang, 30th October 2024: Vawiin khan Dungtlang khuaah Art & Culture Department leh Dungtlang Branch YMA te tangkawpin an buatsaih ‘Cultural Meet leh Vangpui Kut’ chu neih a ni a. Pu C. Lalsawivunga, Art & Culture Minister chuan Khuallian niin a hmanpui a, Pu Laldingliana Sailo, President, Ramhlun North Branch YMA chu khualzahawm a ni.

Khuallian Pu C. Lalsawivunga Art & Culture Minster chuan thusawiin Dungtlang khuain kum tin Vangpui Kut a buatsaih thin chu lawmawm a tih thusawiin Vangpui Kut hmang tura kal khawm zawng zawng te kut chibai a buk a. Vangpui Kut hi Mizo culture vawn him nana thil pawimawh tak a ni a, mahni hnam zia zahpuite chu Hnam dingchhuak an awm ngai lo a, an ral thin a ni a ti. Vangpui Kut hmangtute chu kan culture vawng nunga tihmasawn tura hma la theuh turin a sawm a, aia upa zahna, tlawngngaihna tlahniam tawh ni a sawi mek hi tinung thar leh tura tan lak a pawimawh a, mi harsa zawk te tanpuina kawngah pawh theih tawp kan chhuah a tul a ni a ti. Tunah hian kan ramin harsatna a tawh mek zu leh damdawi hman sualna heng ruihhlo chhungkua, khawtlang, leh thalai te run mektu dolet turin Kut hmanga kal zawng zawngte chuan tan la thar turin a sawm a.

Minister chuan thalai mithiam tak tak ten kan history an chhui mek a, kan hmun hluite hi kan history kan chhuina kawng hmanrua pawimawh tak anih avangin humhalh thar zel a tul a ni, a ti.

Cultural Meet leh Vangpui Kut hi Pu Deny Lalremruata, Vice President, Dungtlang Branch YMA chuan kaihruai a, Pu C. Laldinthara, Comt. Member, Dungtlang Branch YMA chuan hunserh a hmang a; Dungtlang Branch YMA Secretary te atangin YMA report ngaihthlak niin YMA thuthlung sawirual a ni a. Pu F. Lalthanmawia, Deputy Director, Art & Culture Department leh Pu Lalhmuakliana, Dungtlang Branch YMA President te hnen atangin thusawi ngaihthlak a ni bawk.

Dungtlang khuaa Vangpui Kut hmang tura sawm Ramhlun North Branch YMA ten Mizo hnamlam chi hrang hrang an entir a, YMA Zaipawl te thiam taka zaiin Ramhlun North MHIP ten hnam lam an entir bawk a. Dungtlang leh a chhehvel khaw hrang hrang – Sesih Branch, Leithum Branch, Lianpui Branch, Khuangleng Branch, Khuangthing Branch leh Vaphai Branch YMA te leh School hrang hrang ten Mizo hnamlam an entir bakah YMA Zaipawl thiam tak tak ten zaiin mipui an awi a. Khualzahawm Pu Laldingliana Sailo, President, Ramhlun North Branch YMA in thu a sawi bawk a ni.

Dungtlang khua  Vangpui Kut hi kum tin hman thin niin kumin hi tum 38 an hmanna a ni a, kum 2021 atang khan Aizawl khawpui chhunga Branch YMA an thlan chhuah te  an sawm ṭhin a,  kumin ah chuan Ramhlun North  Branch YMA te sawmin Cultural Meet leh Vangpui kut hlimawm tak an hmang ho a ni. Ramhlun North Branch YMA atang hian member 60 chuang an kal a,  he Cultural Meet buatsaihtu Art & Culture Department-a thawktu mi engemaw zatin an tel pui bawk a ni.