Vawiin (24.08.2016) chawhnu dar 3 khan Lawngtlai District Disaster Management Committee chu an Chairman Lawngtlai DC Dr A. Muthamma hovin DC Conference Hall-ah an thu khawm.

Meeting kaihruaitu Lawngtlai DC chuan Mizoram chu chhiat rupna thlen thut theihna hmun hlauhawm berte zinga mi a nih avangin lo hmachhawn dan tur uluk taka zir a, lo inbuatsaih a tul thu a sawi a. Member-te chu DDMC hma lak dan tur ngun taka ngaihtuah turin a sawm nghal.

Committee chuan hma lak dan tur hrang hrang ngaihtuahin, Block level leh Village level Committee din thar te, chhiat rupna hmachhawn dan tur zir hona (training/workshop) buatsaih te, mipuite hnena sem darh tur thu chhuah siam te leh chhiatna hma chhawn dan a tak anga chan chhinna (mock drill) buatsaih te an rel a. Mock drill neih dan tur lo ruahman turin sub-committee din ni se, an ti bawk.

He hunah hian DC office-in District Disaster Management Plan leh Constitution an buatsaih chu peih fel tep a nih tawh thu tarlan a ni a. Office leh pawl hrang hrangte’n anmahni building theuh atan Disaster Management Plan siam a, DC-a theh luh ni se, tih a ni bawk.