Vawiin chawhma dar 10:00 khan Lawngtlai DC Pu B. Lalhmingthanga MCS, District Election Officer chuan Lawngtlai District chhunga MLA bial 3 atan Draft Electoral Roll a tlangzarh. Lawngtlai District chhungah hian voter 65684 awmin voter zawng zawngte hian EPIC siamsak an ni vek tawh a ni.

36- Tuichawng (ST) Assembly Constituency ah hian voter mi 24215 awmin mipa 12116 leh hmeichhia 12099 an ni a. 37- Lawngtlai ‘W’ (ST) Assembly Constituency ah hian voter mi 21681 awmin mipa 10886 leh hmeichhia 10795 an ni a. 38- Lawngtlai ‘E’ (ST) Assembly Constituency ah hian voter mi 19788 awmin mipa 9556 leh hmeichhia 10232 an ni.

Draft Electoral Roll-a siamthat ngai - tihdik, belh leh paih ngai - te chu 1st November, 2011 thlengin siamthat dilna thehluh theih a ni a. Dilna lut te chu 1st December, 2011 hmain endik leh a tul anga siamthat a ni ang a, 5th January, 2012 ah Final Electoral Roll tihchhuah a ni ang. Siamthat duh nei te chuan DC Office, Lawngtlaiah emaw, Electoral Registration Officer te hnenah emaw, Booth Level Officer te hnenah emaw dilna thehluh theih a ni a, hriatchian duh nei tan man chawi ngai lovin telephone in 1950 ah zawhfiah theih reng a ni bawk.