Vawiin khan Lawngtlai District Education Committee (SSA Mission) chu an Chairman, Lawngtlai Bawrhsap Dr A. Muthamma IAS hovin Lawngtlai DC Conference Hall-ah an thu khawm.
He thut khawmah hian Lawngtlai District chhunga elementary level zirna tihhmasawn dan tur leh hma lak ngaihna hrang hrang te sawi ho a ni a. Project LLEAP hnuaia school enrolment drive neih dan report leh hma lak zuina tura rawtna te ngaihthlak a ni bawk.
Lawngtlai District chhunga naupang sikul kal lo leh zirna chawlhsan tam lutuk tihniam tur leh zirlai tam zawk sikul kaltir tura hma lakna Project LLEAP (Let's LEarn And Progress) chu Lawngtlai DC hovin duan a ni a. Hemi hnuaiah hian April 17-19, 2017 chhung khan district chhunga zirna lama hnufual zual khawthlang lam khuaah te enrolment drive kalpui a ni.
He enrolment drive-ah hian zirna kaihhnawih leh department dang thenkhata thawkte chu pawl 8-ah inthenin, chan insemin khaw 28-ah an kal chhuak a. Khawtlang hruaitu, nu leh pa, tlawmngai pawl, zirtirtu leh sikul naupangte nen inkawm khawmna buatsaihin, zirna ngai pawimawh turin an chah a.
