Vawiin chawhma khan Sports & Youth Services Minister Pu Zodintluanga chu Khullian niin, Mizorama climbing wall hmasa ber LDSC Ground-II, Lungleia Outdoor Artificial Climbing Wall chu a hawng.

Pu Zodintluanga chuan Lunglei District-in hmasawnna bung thar a kai leh mai chu a lawmawm a tih thu sawiin, Lunglei mipuiten hmang tangkai tura a duh thu a sawi a. He climbing wall hmang hian talent nei tha te chu chherchhuak in, khawvel hriatah pawh a inphochhuah theih a ni, a ti. Development hian Mizo mipuite rilru a luah khat tawh hle a ni tiin, hmasawnna ruhrel tha a thlen chuan mipuite pawh an lawm a ni, a ti. Lunglei khawpuiin kawng tinrenga hmasawnna ruhrel tha a neih chu hriatpui turin kalkhawm te a sawm a, hmasawnna awmlo anga kan in chhuah thin hian sawrkar pawh a nawr kal lo ve thei a ni, a ti.

Bialtu MLA leh Khualzahawm ni bawk Pu Joseph Lalhimpuia pawhin hmasawnna ruhrel tha kan neih avangin infiamnaah hma kan sawn chak in, India ram aiawh thlenga infiam mite pawh kan lo nei ta hial a ni, a ti a. Tunhma chuan talent tha nei tam tak ten inchherna leh inphochhuahna chance an neilo thin a, vawiinah chuan hmun tinah talent nei tha te haichhuah mek an ni, a ti. Lungleiah sawrkarin hmasawnna tam tak min rawn pe tawh a, chumi hmang tangkai tur chuan thalaite leh mipuite kan pawimawh a ni, a ti a. Infiam mite awmna hmunah discipline tha kan neih chuan, zirna nen a kal kawp ngei ngei tur a ni tiin, infiam chungin zirna boruak tha kan siam a tul a ni, a ti bawk.

He hawnna inkhawm hi Mizoram State Sports Council (MSSC) Secretary Pu C. Laltlanthanga’n a kaihruai a. Lunglei District Sports Committee Chairman Pu K. Lalawmpuia’n thu tawi  sawina hun a hmang a ni. Pu James Lalramnghaka, Asst. Engineer, MSSC chuan technical report pein, he Outdoor Artificial Climbing Wall hi kum 2014-15 Special Plan Assistance (SPA) fund cheng 53,93,136/- senga sak a nih thu a tarlang a. StepIn Adventure, North East Circle enkawltu Pu David Zohmangaiha, Mount Everester enkawlna hnuaiah tha taka siam a ni. He climbing wall hi Lead leh Speed climbing tur atana siam a ni a, national standard niin, National Level Competition thlen theihna tura siam a ni. 

Attachment

  • Loading attachment...