900/2026-2027

Lawngtlai, 9th June 2026 : SIR 2026 kalpui mek zelah vawiin khan Lawngtlai District Election Officer, Pu Donny Lalruatsanga kaihhruaiin DC's Office Chamber-ah Lawngtlai khawpui chhunga BLO- ten 'Review Meeting' an nei.

Pu Donny Lalruatsanga chuan SIR 2026 kalpui mekah BLO - te inpekna leh hnathawh fakawm a tih thu sawiin, Enumeration Forms semchhuah tawh dinhmun enin hna an thawk tha hle a ti a. Enumeration Forms lakkhawm leh Digitization - lamah hmasawnna tur a awm tih tarlangin, hemi kawngah hian chak zawka hnathawk turin BLO- te a chah a ni. Electors Mapping - bikah tun aia tan lak nasat a tul tih sawiin, BLO- te thahnemngai taka thawk turin a chah a ni. DEO chuan Election Commission of India (ECI) in SIR 2026 - a ngaipawimawh hle tih hriaa, ECI beisei ang taka hnathawh chhunzawm zel a tul hle tih sawiin, BLO - te an mawhphurhna tha taka hlen turin a chah nghal bawk.

Thutkhawmah hian BLO- hmalak tawhna kawng hrang hrangte sawiho a ni a. A bik takin Electors Mapped Percentage - bikah BLO thenkhatten tan an lak thar a tul hle tiin, chak zawkin hma lo la se an ti a. SIR 2026- tha taka kalpui tur leh Electoral Roll felfai, rintlak leh thianghlim nei turin BLO - an pawimawh hle tih pawm tlangin, thahnemngai taka thawh chhunzawm zel ni se an ti a ni.

Vawiin 'Review Meeting' ah hian 36- Tuichawng (ST), 37- Lawngtlai West (ST) leh 38- Lawngtlai East (ST) a ERO, AERO, bakah Lawngtlai khawpui chhunga BLO- te an telkim thei a, Pu Donny Lalruatsanga chuan lawmthu sawiin hun a khar.