No.3139/2019-2020

Lawngtlai District Environment Management Committee chu vawiin khan Lawngtlai DC Conference Hall-ah an Chairman, Lawngtlai Bawrhsap Pi Shashanka Ala, IAS hovin an thu khawm a. Lawngtlai District chhung a lo thianghlim a, a lo hrisel zel theihna tur ruahmanna hrang hrang an sawi ho.

He meeting-ah hian member - a kaihhnawih state leh LADC department hrang hrang hotu te, tlawmngai pawl ai awh leh khawtlang hruaitu lam te an kal khawm a. Lawngtlai District Environment Plan 2020-2021 chu thlir hovin, a bawhzui dan tur an sawi ho nghal bawk.

Lawngtlai Bawrhsap Pi Shashanka Ala chuan chak takin khawpui a thang a, bawlhhlawh khawn khawm dan leh tihral dan felfai tak a awm loh chuan bawlhhlawh nen inchiahpiah nuaih a tul thuai dawn tih sawiin, kum 50 hnu lam thleng pawha rin theih tur leh harsatna thlen lo tur ruahmanna tha neih a pawimawh a ni, a ti.

LADC Sanitation Department chuan Lawngtlai khawpui bawlhhlawh paihna leh sawngbawlna tur ram hmun hnihah a dah fel tawh a. He ram hi a nih tur ang taka bawlhhlawh paihna leh sawngbawlna atana buatsaih fel thuai tura hma lak nghal ni se, tiin District Environment Management Committee chuan a rel a. LADC atangin a hma thei ang berin solid waste leh plastic waste sawngbawl dan tur kalphung duan ni se, Sanitation Department-in bawlhhlawh khawn dan leh hmun phiah dan hun bithliah siamin, WhatsApp hmangin theh darh se, tih a ni a. Bawlhhlawh thliar hran leh sawngbawl dan dik hman a nih theih nan mipuiah a tam thei ang ber inzirtir ni se, tih a ni bawk.

Attachment

  • Loading attachment...