No.3138/2019-2020

Vawiin khan Lawngtlai Bawrhsap Pi Shashanka Ala, IAS chuan Lawngtlai Electric Venga Deputy Commissioner ram (land lease) huam chhunga mimal leh sawrkar department awmte DC Conference Hall-ah ko khawmin, ram luah dan leh chhiah pek dan a sawipui.

Lawngtlai Electric Vengah hian state sawrkar hnuaia department hrang hrangin office leh quarters sak nana an luah theih tur Lai Autonomous District Council (LADC) atangin DC hminga ram pek (land lease) a awm a. He DC land lease hi department hrang hrangah sem sawm ve leh niin, LADC-a chhiah chhun luh tur a ni a. He chhiah hi DC land lease hnuaia department ram luah te chuan DC-ah chhung khawmin, hei hi DC office atangin LADC Revenue Department-ah chhun luh ve leh thin a ni.

Hetih lai hian DC land lease-in a kualkhung chhungah sawrkar department leh mimal pass (land lease) hran nei eng emaw zat an awm a. Hemiah hian chhiah chawi danah ngaih pawlh theih leh fel tawk lo awm theia a lan avangin a chin fel dan tur leh hma lak zui dan tur sawi ho a ni.

Felfai tak leh dik taka chhiah pek a nih theih nan DC land lease kualkhung chhunga department leh mimal ram neite'n an pass copy DC office-ah theh lut se, chumi atang chuan DC ram chin chiang taka chhinchhiah fel ni se, DC hnuaia department ram luahtute ram luah chin pawh uluk taka teh that vek niin, chumi mil chuan chhiah chawi dan tur pawh siam that ni se, tih a ni a. Hemi atan hian DC office leh LADC Revenue Department te'n tunkarah joint survey nei nghal se, tih a ni.