Krishi Vigyan Kendra (KVK) Lawngtlai chuan vawiin khan Kawlchaw West-a theihai (rangkuai) chingtute tan theihai lawh hnua sawngbawl zui dan ‘post-harvest management’ leh mango squash leh mango bar siam dan zirtirna an buatsaih.

He training-ah hian KVK Lawngtlaia Senior Scientist & Head Dr C. Lalfakawma chuan theihai rah lawh hnua sawngbawl zui (post-harvest management) pawimawhzia sawiin, theihai rah tla leh nget, hralh tlak si lohte paih bo mai mai lova hlawk zawk leh tangkai zawka siam danglam dan thiam a tulzia a sawi a. Chuti ang zawnga rilru seng thui zel tur chuan theihai chingtute a fuih a ni.

Mango squash leh mango bar siam dan hi KVK Lawngtlaia Scientist (Home Science) Pi Vanlalruati’n a zirtir a. A thua zirtir an nih bakah, a taka siam dan tih chhinpui an ni a. Theihai chingtute’n an theihai rawn ken khawm atangin mango squash hi bur (bottle) za chuang siam a ni.