Vawiin khan Tlabung leh a chhehvela tuilian tuarte tan, Health & Family Welfare Minister Dr. R Lalthangliana hmalaknain a thlawna inentirna hun ‘Free Clinic’ buatsaih a ni. 

Tukin zing dar 9:30 atang khan free clinic neihna hmun - Sub-Divisional Hospital, Tlabungah hming ziah luh hun hawn niin, chawhnu dar 1 thleng khan puitling 250 leh naupang 100, an vaiin mi 350-ten inentir tumin hming an ziahluh tir a, Lungleia Civil Hospital-a Medical Superintendent Dr. SR Ngurchamliana bakah, Senior Specialist Dr. Catherine Lalmuanawmi, Pediatric Dr. Lalramsanga Khiangte leh Dr. David Lalsangliana, Medical Officer-ten inentirte chu hriselna lama an harsatna zawtin an lo endik zel a ni. 

Inentir tam zawkte zingah pum lam leh a kaihhnawiha insawisel an tam deuh ber a, an zingah hmunpui lam pan tura tih mi thenkhat an awm bawk.  Vawiina free clinic-a inentirte hnenah hian an mamawh damdawi a thlawna sem nghal zel a ni a, Tlabunga Sub-Divisional Hospital-a thawkte chuan a tul apiang tiin Lungleia doctor-te leh mobile medical unit team-te hi an lo puibawm a ni. Free Clinic buatsaih hi a hlawhtling hle a, Tlabung khaw chhung mai bakah a chhehvel khaw hrang hrang atangin min thahnem tak an inentir a ni.