2456/2025-2026

Lawngtlai, 29th November, 2025 : Lai Autonomous District Council (LADC) hnuaia 12th Member of District Council (MDC) inthlanpui 2025 - lo awm tur atan a inbuatsaihna kal zelah vawiin chawhma dar 11:00 AM  khan District Level Standing Committee - ten DC Conference Hall-ah thutkhawm an nei a. Pu Donny Lalruatsang District Election Officer (DEO) chuan thutkhawm hi a kaihruai.

Pu Donny Lalruatsang chuan kalkhawmte hnena lawmthu sawina a nei hmasa a. Inthlanna fel fai leh tluang tak a neih a nih theih nan Election Official-ten theihtawp an chhuah reng tih tarlangin, NGO - te nen thawhhona tha tak a  awm chu lawmawm a tih thu a tarlang a ni. Model Code of Conduct (MCC) khauh  tak a kalpui mek a ni tiin, Political Party - lam pawhin an zawm tha hle nia ahriat thu a sawi . DEO chuan India ramah mipuiten an aiawha roreltu an thlan thin angin inthlanna neih fo a ni a, hemi kawngah hian Official - te leh NGO - te inkarah thawhhon tha a awm zel a pawimawh tak zet a ni, a ti. DEO chuan inthlanna  lo awm turah kawng engkimah infinchhuah tawn a tul hle tih tarlangin, NGO, Political Party leh Mipuite thawhpuiah a sawm nghal a ni.
Pu PC Lalchunglura, Superintendent of Police (SP) haichuan dan leh thupek kenkawh kawngah theihtawp chhuah mek zel a ni, a ti a. Tun dinhmunah Security Duty - tur te ruat fel vek tawh a ni a ti a, a tul dan a zir a indah belh ngaite pawh dah belh zel a nih tur thu a sawi a. Security Duty - tur te tan naktukah Training runpui neih a nih tur thu a tarlang bawk.

Pu Collin Hlychho, Election Officer chuan Polling Team - tan training vawi hnih neih a ni tawh a, thawhtan atangin an duty na tur hmunah an chhuak tan tawh dawn a ni, a ti . Security, Driver leh Polling Team - ten vote an thlak tawh a, vawiin lamah pawh thlak chhunzawm a ni, a ti. Candidate - te senso (Expenditure) vawi hnih endik tawh niin, ni 1. 12. 2025, Thawhtan (Monday ) ah endik leh a ni ang a ti.  Vote thlak ni tur Ni 3, December 2025 - ah engkim peihfel tura hmalak a nih thu a sawi a ni.

Vawiin thutkhawmah hian District Level Standing Committee Member-te an tel kim tha hle a, Pu Donny Lalruatsanga chuan lawmthu sawina neiin hun a khar.