4056/2024-2025

Lawngtlai, the 3rd February 2025 : Vawiin chawhma dar 11 khan Lawngtlai District Level Task Force for Immunization chuan DC Conference Hall- ah thutkhawm an nei a,  Pu Zoramsiama Hmar, Addl. DC chuan thutkhawm hi a kaihruai.

Pu Zoramsiama Hmar,  chuan kalkhawmte hnena lawmthu sawina a nei hmasa a. Natna inventheih chi 11 laka inveng tura hunbi nei a  Vaccine pek chhuah kawngah Lawngtlai District in hmasawnna tur a la ngah hle tih a tarlang a. Khaw tam taka Vaccine la duh lo an la awm chu veiawm a tih thu tarlangin chak zawka Awareness kalpui a tul hle a ti. District hrisel ni turin mitinin mawhphurhna lian tak an nei vek a ni tiin, Addl.DC chuan Lawngtlai mipuite theihtawp chhuahpui  turin a sawm.

Pu Zoramsiama Hmar, chuan Lawngtlai District - a Universal Immunization Programme (UIP) kalpuitu - Tattva Foundation leh World Health Organisation ( WHO) a thawk  lokalte hnenah theihtawp chhuah tura chahin, anmahni puih tura  District Administration - te an awm reng thu a tarlang a. Chak zawk leh mi tam zawkin Vaccine an lak ngei theihna turin BDO,VC, NGO leh Kohhran hruaitute an pawimawh tiin, thawhpui turin a chah bawk . Tih dam aiin inven a pawimawh zawk  tih tarlangin,  Pu Zoramsiama Hmar chuan natna inventheih laka inveng tur leh hriselna tha zawk nei theuh tura theihtawp chhuah zel tura  Lawngtlai district mipuite sawmin,  vaccine pekchhuah kawnga thawktu zawng zawngte an hmalakna turah duhsakna a hlan nghal bawk.

Dr. S. Thaizi, ( DIO) chuan Universal Immunization Programme (UIP) hnuaia hmalakna hrang hrang a tarlang a. Lawngtlai District - ah March -  December 2024 chhung khan  0 -11 months ah Fully Immunized  mi - 1276 ( 53.5 %) leh 1-2 Yrs ah Fully Immunized mi -1245 ( 47.1%) an awm  a ti a, March 2025 ah chuan  fully immunized hi -  70% a nih a  beiseiawm a ti.

Pu Zakir Abbas, Regional Consultant, UNICEF, chuan Tattva Foundation leh  UNICEF hmalakna tlangpui a tarlangin, GAVI (Global Alliance for Vaccines and Immunization) chu Mizoram bakah Arunachal Pradesh, Meghalaya leh Nagaland ah te kalpui mek a ni, a ti a . Dr. A. Rebecca Sharma, SBC- UNICEF chuan High Risk Area Mapping, Social Mapping of HRA, Recognition & Appreciation leh Number of Children Converted-  tih thupui hmangin presentation a pe a. Dr. Purushottam D. , Consultant, WHO pawhin  Universal Immunization Programme (UIP) hnuaia an hmalakna hrang hrang a tarlang bawk.

Vawiin thutkhawmah hian Lawngtlai District Level Task Force for  Immunization Members- te an tel kim vek thei a,  Pi Kimi Sima Toppo, State Programme Coordinator chuan lawmthu sawina neiin hun a khar.