4055/2024-2025

Champhai, 3rd February 2025: Mizoram Road Safety Council thutlukna angin kumin February thla hi Road Safety Month atan puan a ni a. Champhai District-ah pawh he hun hman dan tur relin vawiin khan Bawrhsap Pu VL Remliana hovin District Level Road Safety Committee chu DC Conference Hall, Keifangtlangah an ṭhukhawm a ni.

He hunah hian Pu VL Remliana chuan kalkhawmte lawmna thu sawiin, Road Safety Month hlawhtling taka neih a nih theih nan an ngaihdan te thawh a, an chanpual ṭheuhah theihtawp chhuah turin a ngen a. Ṭhutkhawm neihna chhan te sawifiah turin Pi Lalruatpuii Hnamte, District Transport Officer a sawm zui nghal a ni.

District Level Road Safety Committee hian Champhai District-a Road Safety Month hawnna chu February ni 6, zing dar 07:30 ah CHANEM tualah neih ni se tiin an rel a. He huna tel tur hian sawrkar pisa hotute, sawrkar driver-te bakah Champhai District-a motor neitu/ khalhtu inzawmkhawm pawl hrang hrang te sawm ni se an ti a ni. Road Safety Month hman chhung hian MVI, Police leh Excise ten khawng takin motor leh a khalhtute endikna (checking) an kalpui bawk ang.

Road Safety Month hman a nih chhung hian kawngpuia veivak leh lirthei khalhtute him zawkna turin inzirtirna uar takin kalpui a ni dawn a. Zirna in hrang hrangah zirlai ten thutiam (Road Safety Pledge) an la ang a, NCC ten traffic duty te an pui bawk ang. Hei bakah hian lirthei hralhchhuaktute (Vehicle Dealers) chu an dawr hmunhmaah Road Safety Month lam hawi inzirtirna tar chhuak tura beisei an ni bawk.

District Level Road Safety Committee hian tunhnaia chetsualna thlen tamna hmun Champhai Zotlang- New Champhai kawngpui, Faith Farmhouse leh 7th Day Workshop inkarah vaukhanna (warning sign) mumal tak siam ni se tiin an rel a. Kawng enkawltu PWD Highway Division te hnenah lirthei  tlanchak lutuk tur ven nan ‘speed breaker’ siam tura ngen ni se tiin an rel bawk a ni.

Vawiin ṭhutkhawmah hian Champhai Bawrhsap Pu VL Remliana, Dy. SP (Hqrs) Pu Dennis Vanlallura, DTO Pi Lalruatpuii Hnamte te bakah CMO, DEO, PWD, Excise, MVI leh I&PR aiawhte an tel a ni.