4054/2024-2025

Lunglei, 2025 Ramtuk thla ni 3: February ni 12, 2025-a Lunglei District-a village council (VC) leh local council (LC) inthlanpui buatsaih tura mawhphurhna hrang hrang chelh tura ruat, nodal officer-te chu vawiin khan District Election Officer Pi Navneet Mann hovin a hna thawh pindanah an ṭhu khawm a. Inbuatsaihna kal mek an thlir ho.

He hunah hian nodal officer-te chuan an hma lakna report pein, inbuatsaihna tluang taka kalpui a ni tih tar lan a ni a. A theih chin chinah ruahmanna siam fel niin, tluang takin inthlan buatsaih theih a nih beisei a ni.

He hunah hian inthlan buaipuitu tur polling official-te ruat fel an nih tawh thu leh training ṭul ang pawh buatsaih a nih thu te, RO, PRO, APRO leh PO training hnuhnung ber chu February ni 6, 2025-ah buatsaih tum a nih thu te tar lan a ni a. Ballot paper pawh her chhuah zawh a nih tawh thu te, electoral roll chhinchhiah fel hna leh inthlanna lehkha leh hmanraw pawimawh ruahman hna te kalpui mek a nih thu te tar lan a ni a. Inthlan kaihhnawiha mawhphurhna neite tan postal ballot hmanga vote thlak theihna ruahmanah, District danga vote nei, postal ballot hmanga vote thlak tumte tana hun hawn chhungin dilna 103 dawn a nih thu te, Lunglei District chhunga vote neite tan February ni 7, 2025 thleng dilna hun hawn a la nih thu leh tun thlengin dilna 500 dawn a nih tawh thu te tar lan a ni bawk. 

Lunglei District-a VC 88 leh LC 24 awmah VC pahnih (seat 3 ve ve awmna)-ah chuan inthlan chuhtu awm chhunte chuh buaitu an awm loh avangin vote thlak ngai lova tlinga puan an ni a. VC 86 leh LC 24-ah, seat 486 (general seat 356 leh reserved seat 130) atan inthlan hi buatsaih a ni ang.

Attachment

  • Loading attachment...