Kum danga an lo tih thin angin, vawiin khan Lawngtlai District MJA te chuan Green MJA Day an hmang a. Thing an phun tawh sa hung that nan leh thing tiak phun belh nan an hmang.
Lawngtlai District MJA President Pu ZD Dengngura chuan Day hawnna thu sawiin, khawvel thang zelah boruak inlumlet chuan khaw lum a tizual hle tawh a; khaw lum zel tur ven nan thing phun hi kan uar a ngai a ni, a ti a. Kan thing phunte puitling ngei tura enkawl chhoh zel chu a phuntute mawhphurhna a nih thu a sawi bawk.
Lawngtlai MJA te'n vawiin Green MJA Day an hmannaah hian kum hmasa lama thing an lo phun tawh, Lawngtlai atanga Mampui panna kawngpui kama mi chu hung thain, thing tiak an phun belh bawk a. He'ng bakah hian, Press Club bula an thing phunte pawh a hungna a chhiat tawh avangin an hung tha vek bawk a ni.
He Green MJA Day-ah hian Lawngtlai District-a MJA member-te an thawk chhuak tha hle a. Lawngtlai DIPRO Pu C.Lalhruaitluanga pawhin he hun hi a hmanpui a ni.
