Vawiin  khan Secretariat Conference Hall-ah  Chief Secretary, Pu Lalmalsawma IAS hovin State Level Bankers Committee (SLBC) chu Financial Year kum 2016-17 chhunga Mizorama Bank-te hnathawh thlirletin an thukhawm. 

SLBC meeting-ah hian Chief Secretary Pu Lalmalsawma chuan Chief Minister-in Mizoram Bank ten  CD ratio (deposit an dawn zawng zawng atanga loan pekchhuah zat) tha an neih a tul a ti tih sawiin Bank hotu lokal khawmte chu chutiang lama hma la turin a chah a. Pu Lalmalsawma chuan National Livelihood Mission hnuaia loneitute tan dahkham ngailova loan lak theihna chu Finance Minister in a ngaihpawimawh thu leh tun aia chaka kalpui turin SLBC chu a chah thu a sawi bawk a ni. 

SLBC thutkhawmah hian kum kalta 2016-17 chhunga Mizorama Bank awm zawng zawngte hnathawh dan tlangpui tarlan a ni a, chungte chu :

1.       Total Deposit : Rs. Vbc 7902.43

2.       Total Advances: Rs. Vbc 3151.12

3.       Credit Deposit Ratio (CD ratio) 39.88 % a ni a, nikum March 2016 aiin 4.31 % in a hniam zawk a ni.

4.       Mizoram District zingah CD ratio hi Siaha District-ah sang berin 115.25 % a ni a, Aizawl District-ah CD ratio hi hniam berin 32.65 % a ni.

5.       Bank zinga CD ratio bituk 20% phak lo  chu Yes Bank, ICICI Bank, Federal Bank, South Indian Bank leh Axis Bank-te an ni a. SLBC meeting-ah hian CD ratio bituk zat pha velo Bank 5 te chu kumin September thla ral hmaa bituk zat phak ve ngei thei tura hma la turin hriattir an ni.

6.       Total Advances atang hian Priority Sector Advance chu 57.56 % niin cheng vaibelchhia 1814.06 a ni a. Priority Sector Advance zat bituk 40% aiin 17.56% in a sang zawk a ni.

7.       Total Advances atangin Agriculture Loan chu 5.55% niin cheng vaibelchhia 174.94 a ni a, Agriculture Loan tur zat bituk 18% chu 12.45% in a phak lo a ni.

8.       2016-17 chhung hian loan pekchhuah zat chu cheng vaibelchhia 1268.75 a ni a, Annual Credit Target chu 14.98% in a khum a ni.

9.       2016-17 chhung hian MSME (Micro Small and Medium Enterprises) loan chu cheng vaibelchhia 109.88 in a pung a ni.

10.   2016-17 chhung hian MUDRA loan mi 3929 hnenah cheng vaibelchhia 94.57 pek a ni.

11.   2016-17 chhung hian Stand Up India scheme hnuaiah loan mi 53 hnenah cheng vaibelchhia 10.98 pek a ni a, chung zinga mi 16 chu hmeichhia niin cheng vaibelchhia 4.06 pek an ni. 

He meeting-ah hian Bank hrang hrang aiawhte, Mizoram sawrkar hnuaia department thenkhat aiawhte  bakah Mizoram pawn lam atangin RBI leh NABARD hotute an tel a ni.