Vawiin khan SP Conference Hall ah Lawngtlai District chhunga Police Officer, Assistant Sub- Inspector, Sub Inspector leh Inspector te tana buatsaih misual hnuchhui dan training ni hnih awh tur chu Lawngtlai Superintendent of Police Pu Lalringdika, MPS chuan a hawng.

Pu Lalringdika chuan training nei tura koh officer te chu Law and Order leh Investigation khawihtu tak tak chinte an nih avangin a pawimawh hle a ni a ti a,  hlawkpui ngei kan tum anga, hriat chian loh kan neih apiangte pawh uluk takin kan zawt chiang vek tur ani a ti. Tunlai khawvelah sualna chi hrang hrang a awm belh zela, Tunlai thiamna mil zela kan intuaihriam a tula, kan thiam tawh emaw kan tihte pawh hi thiltisualtute leh an tihsual dan a zirin a lo dang lam leh mai thin tih hre chunga kan inzir thar zel a ngai a ni a ti.

Training nikhatna ah hian Pu Laldinpuia, Chief Judicial Magistrate Lawngtlai, Pu C. Lalengliana, MPS, SDPO Chawngte leh Pu Tlualaisa, MPS SDPO Lawngtlai ten misual hnuchhui dan chi hrang hrang an zirtira, sawihona hun hman nghal zel ani bawk. Naktuk, a nihnihna ah Pu KL Vulmawia, Addl. SP Lawngtlai, Pu C. Lalengliana, SDPO Chawngte leh Pu Tlualaisa SDPO Lawngtlai ten zirtirna an pe chhun zawm bawk ang.

Vawiin training hawnna inkhawm hi Pu KL Vulmawia, MPS Addl SP Lawngtlai chuan a kaihruaia, training neih chhan leh neih dan turte sawifiahin training nei tura kal khawm Police Officer te chu theihtawp chhuaha an zir turte hriat chian tum turin a fuih a ni.