Lawngtlai District Level Committee on Swachh Bharat Mission (Gramin) chu vawiin khan an Chairman, Lawngtlai Bawrhsap Pu N. Chakhai MCS hovin Lawngtlai DC Conference Hall-ah an thu khawm a. Faina kawnga hma lakna tur hmachhawp hrang hrang an sawi ho.

He hunah hian SBM(G) District Committee-a member secretary, PHE EE Er Laltlanchhunga chuan tun hnaia hma lakna tur hmachhawpte sawi fiahin, member-te'n uluk takin an ngaihtuah ho va. Vantlang inthiarna (community sanitary complex) sakna tur khaw 27 leh bawlhhlawh sawngbawlna (solid & liquid waste management) siamna tur khaw 38 thlan chhuah a ni a. Vantlang inthiarna hi unit 1 Rs nuai 2 zela sak tur niin, a vaiin Rs nuai 54 hmuh a ni a. Bawlhhlawh sawngbawlna hi a khaw len dan azirin Rs nuai 7, nuai 12, nuai 15 leh nuai 20 tea siam tur niin, a vaiin Rs nuai 372 hmuh a ni bawk.

Faina kawnga hma sawnna a nih beiseiin SBM(G) hnuaiah khaw fai inelna buatsaih ni se, tih a ni bawk a. Lawngtlai khawpui chhunga veng hrang hrangte inelna tur leh Lawngtlai District chhunga block tina khaw hrang hrangte inelna tur a hranin ruahman a ni a. Khawpui chhung inelna hi October ni 2 hian result puan hman tum niin, block level inelna erawh chu October thla laihawlah zawh hman tum a ni thung.