Election Commission of India Flagship Program pawimawh tak Systematic Voters’ Education and Electoral Participation (SVEEP) chu Lunglei District huam chhungah ngawrh taka kalpui mek zel a ni a. He hmalakna kal zelah vawiin khan Convention Centre-ah zirlaite leh tlawmngai pawl hrang hrang te tan election chungchang inzirtirna hun ‘Electoral Literacy for Young Voters & NGO’s’ program buatsaih a ni.

He hun hi Dr. Ankita Chakravarty, DC & DEO Lunglei chuan kaihruaiin, he hun hmang tura lo zirlaite leh lo tel zawng zawng mipuite lawmna thu a sawi a. India khua leh tui vote nei thei chin te chuan vote thlak kan ngaih pawimawh a tul a, India ram State hrang hrang dinhmun enin vote thlak percentage a sang lutuk lo thin a, hetih laiin Mizoramah erawh 80% vel vote thlak an awm thin chu thil lawmawm tak a nih rualin, tun aia tam zawkin vote kan thlak zel theihna turin vote thlak kan ngaih pawimawh thar zel a pawimawh thu a sawi.

Pu Lianchama Chhangte, Financial Secretary, MJA Lunglei chuan thu sawiin, SVEEP chungchang pawimawhna sawiin, India khua leh tui kum 18 tling chin, mi tam zawkin vote an thlak theihna tura inhrilhriatna a ni a ti. India khua leh tui vote nei thei chin kan nih chuan vote thlak hi kan dikna chanvo leh kan mawhphurhna pawimawh tak a ni a, kan ngai pawimawhin vote thlak loh mai mai chin loh tur a ni a ti.

He hunah hian ‘Voting for All’ tih thupuia hmangin Extempore Speech intihsiakna neih a ni a, result puan nghal niin, pakhatna - Lalremliana Chhakchhuak, HATIM, pahnihna - B. Lallawmzuala, Govt. Leitlangpui HSS, pathumna - F. Laltanpuia, Govt. J. Buana College te an ni.

SVEEP chungchanga Awareness atan ‘Slogan Writing Competition’ buatsaih result pawh puan nghal niin, he competition-ah hian mi 190 an tel a, Top 20 te hnenah lawmman pek niin, pakhatna atanga pathumna lawmman dawngtute chu, pakhatna - T. Vanlalawmawmi, Rahsiveng, pahnihna - R. Lalnunthara, College veng, pathumna - C. Lalchhanchhuaha, HATIM zirlai te an ni.

He Campaign programme-ah hian Special Item leh Quiz hlimawm tak Pu H. Lalsiamliana hnen atangin neih a ni a, Dr. Peter Malsawmtluanga, SDC & DLMT chuan EVM & VVPAT chungchang zirtirna Projector hmangin a neih bakah kalkhawm ten a tak ngeiin vote an thlak chhin a, Pi C. Lalremruati, DIPRO Lunglei chuan lawmthu sawina hun hmangin, District SVEEP Icon CR. Laldingliani chuan zaiin kalkhawmte a awi a ni.

Systematic Voters Education and Electoral Participation (SVEEP) hi mi puitling vote nei thei chin India khua leh tui dik tak ten vote neih hlutna an hriat thar lehzualna tur leh vote thlak pawimawhna leh vote thlak ngei tura dan in min phut thu te inzirtirna a ni. Lunglei District SVEEP hmalakna hnuaiah hian Slogan Writing Competition leh Painting Competition te buatsaih tawh niin Rally pawh buatsaih tum a ni a. District Level Master Trainer te kaihhruaina hnuaiah EVM leh VVPAT hmelhriatna ‘Awareness Campaign’ ngawrh taka kalpui mek niin NGO, zirlaite leh mipui thahnem tak hnenah awareness pek mek zel an ni. Lunglei District huamchhunga Assembly constituency zawng zawng tlawh chhuak turin 7th September khan Mobile Polling Station Van 14 vailiam an ni a. Heng te hian khaw hrang hrang tlawh chhuakin Systematic Voters Education and Electoral Participation (SVEEP) Awareness Campaign an kalpui mek zel bawk a ni.