Vawiin nileng khan Chief Minister Office's Conference Hall-ah, PWD Minister Pu Lal Thanzara kaihruaina hnuaiah Public Works Department (PWD) hnuaia hnathawhte, la thawh mek leh hmachhawp hrang hrang te thlirletna hun neih a ni.

Kumin chhunga PWD Review Meeting vawi 3-naah hian Chief Engineer (Highways), Chief Engineer (Roads), Chief Engineer (Buildings) leh Chief Engineer(Planning,PWD) hnuaia hnathawh tlangpuite chungchangah te Pu Lalram Thanga, Principal Secretary, PWD chuan report tawi a pe hmasa a. Hemi hnuah hian PWD hnuaia hmasawnna ruhrel hrang hrang siam zawh tawh leh leh hmalak mek te sawi a ni a. Tanlak ngai laite, hmalakna kal mekah te thawh hmasak tur leh ngaih pawimawh zual tura hriatte pawh sawi ho a ni a. Chak zawka hnathawh chhunzawm dan tur te pawh PWD Minister Pu Lal Thanzara hovin  rel a ni.

Vawiina PWD Review Meeting-ah hian Chief Engineer (Highways) hnuaia hnathawh te : NH 54 (Lailapur to Tuipang Roads), NH 302 (Lunglei to Tlabung Roads), NH 6 ( Seling to Champhai) leh KMMTTP  te thlirho a ni a. Chief Engineer( Roads) hnuaiah:  Aizawl - Thenzawl - Lunglei Roads, Mamit - Bairabi Roads, Bairabi - Zamuang Road, KDZKT Road, PMGSY Roads leh a dangte thlirho a ni a. Chief Engineer (Buildings) hnuaia khawpui chhunga kawng te leh CE (Planning) hnuaiah hmachhawp awm mek chungchangte sawiho a ni bawk a ni.

PWD Review Meeting vawi 3-naah hian  Pu R. Vanlaltluanga, E - in- C, PWD,  Pu K.Lalsawmvela, Chief Engineer(Highways), Pu R. Lalrintluanga, Chief Engineer( Roads), Pu Lalmuankima Henry, Chief Engineer (Buildings) leh Pu Bowman, CE(Planning) te bakah SE zawng zawng te leh an hnuaia hnathawk engemaw zah an tel a ni.