Vawiin chawhma dar 10:30 AM khan Lawngtlai DC Pu B. Lalhmingthanga MCS, Chairman, District Education Committee chuan ni hnih (2) awh tur ‘Orientation Training for Untrained Teachers under SSA Mission: Lawngtlai District’ a hawng. He training hawnna hi SSA BRC Hall, Council Veng, Lawngtlaiah hman niin Pu Vanlalvuana, Dy. DPC, SSA Lawngtlai District in a kaihruai a; Lawngtlai khawchhung leh district chhung khaw hrang hrang atangin SSA hnuaia zirtirtu 69 an tel a ni.
Pu B. Lalhmingthanga chuan Mizorama zirnain hma a sawn theihnan Sorkar leh SSA in zirtirtu engemaw zat a lak bakah nasa takin hma a la a ni a ti a. Zirtirtute chu zirlaite kaihruai thei tura inzir thar reng peih turin a chah a; naupang zirtir chauh ni lovin mi puitling chherchhuak turin a fuih a ni. Mizorama zirna siamtha turin Sorkarin Education Commission a din a; zirna siamthat tumna a hlawhtlin theihnan zirtirtute hi Quality Teacher an nih a ngai a ni a ti bawk.
He training hawnnaah hian Pu Lalzarliana, Vice Principal DIET Lunglei chuan training neih dan tur tlangpui a sawi a. DIET Lunglei atangin mithiamten SSA Mission hnuaia zirtirtute hi training an pe dawn a ni.
