Aizawl Theological College in Council for World Mission atanga rawn telte tana Face to Face India 2011 Programme a buatsaih, nizana ATC, Durtlanga neihah Chief Minister Pu Lal Thanhawla chuan a hmanpui.

Chief Minister chuan Council for World Mission (CWM) a thawk lokal te chu Kristaa a unaute an ni tiin thinlung taka alo lawm thu a sawi a. London khawpuia CWM in kum za a tlin lawmna a neih tuma khualzahawma alo tel ve tawh thu sawiin, a hlawkpui hle a ni a ti a. Pathian mit hmuhah Mizote hi vohbik kan ni ani ang tiin, khawvela sakhua lian ber ber pathum, Muslim, Buddhist leh Hindu ten min karcheh tlat chung pawhin, lungbul,thingbul be thin nimahila A Chanchintha hmangin min rawn zawng chhuak a ni a ti a. Kum za vel kristian kan lo nih ve tak hnu hian A Chanchintha hril turin India ram hmun hrang hrang leh ram pawn thlengin missionary kan tir chhuak ve thei ta hi a ropuiin, Pathian malsawmna vek a ni a ti.

Mizoram chu India rama state te ber te zinga mi kan ni tiin, Pu Hawla chuan ami cheng maktaduai khat awrh chauhte hi hnam intluktlang, inpawh tak leh inthliarna awm miahlo a ni a ti a. Hei hi kristian kan nihna nen pawh a inhmeh hle a ni a ti. Mizoram pawn atang leh ramdangmi programme a lo tel te chu Mizorama an cham chhungin kan nunphung leh hnamziarang te chu tawnhriatah nei theuh turin a chah a. Hetiang kawnga Japanese ten ‘homestay program’ an neih thin hi nunphung leh hnamzia inhriat tawn theih nan a that hle a rin thu a sawi bawk a ni.

Chief Minister chuan kan hnathawhna theuhah kristian pumhlum tha tak nih tum vek turin mitin te a chah a ni.

Mizoram Presbyterian Synod bultum, ATC leh Bishop’s College, Kolkata tangdun ina a buatsaih, he programme hi Mizorama a hmasa ber a ni a. Khawvel hmun hrang hranga Theological Institutions a thawk leh zirlaite tana in hriat tawn nana (exposure) buatsaih thin a ni a. Tun tumah hian Australia, Myanmar, Fiji, Madagascar, Zambia, Kiribati, Congo, Sri Lanka leh South India leh Kolkata atangte in mi 11 an lokal a ni. Tuna programme hi ni 18 October 2011 thleng awh tur a ni a. Vawiin atanga ni 30 September thleng hian orientation programme neih a ni anga, ni 1 - 8 October thleng thingtlang hmelhriatna (Rural exposure) neiin, Mizo nunphung, khawsakzia te zirin Khawlailung, Biate, N.Vanlaiphai, E.Lungdar leh Sialhawk te an tlawh anga. Ni 10 - 18 October thleng hian khawpui (urban exposure) nunzia zirin Aizawl hmun hrang hrang an tlawh bawk ang.

Inkhawm hi Rev Zosangliana Colney in a kaihruai a. Palaite hnenah hian Chief Minister nupui Pi Lal Riliani chuan ngaihhruina thilpek a hlan bawk a ni. Mizo lam chi hrang hrang leh zai te ngaihthlak a ni bawk.

Programme a tel zawng zawng te tan Chief Minister hian zanriah a buatsaih sak a ni.