Vawiin khan Lawngtlai District Task Force Immunisation (DTFI) chu an Chairman, Lawngtlai DC Dr A. Muthamma IAS hovin a office chamber-ah an thu khawm.

Member Secretary, District Immunsation Officer Dr S. Thaizi chuan agenda a chhawp chhuak a. Senior Medical Officer (WHO) Dr Lalhlimpuii chuan powerpoint presentation hmangin hri danna (immunisation) pek chungchanga Lawngtlai District dinhmun leh hma lakna tur te a sawi fiah.

He hunah hian Routine Immunisation (RI) leh Mission Indradhanush (MI) hnuaia Lawngtlai District chhunga hri danna (vaccine) pek tawh dan leh harsatna hrang hrang awm te sawi ho niin, a sut kian dan tur ngaihtuah ho a ni a. January ni 31, 2017 atanga zenghri danna pek thawh khatna (Intensified Pulse Polio Immunisation 1st Round) kalpui tur chungchangah, fur ruahtui tlak hmain khaw tin tlawh chhuah hman tum ni se, tih a ni a. He IPPI thawh khatnaah hian hmun 181 atangin naupang kum 5 hnuai lam 17692 hnenah hri danna pek tura ruahman a ni. Data rin tlak zawk a awm theih nan leh hma lak dan tur ruahmanna felfai zawk a awm theih nan health worker-te’n an bial chhunga naupang awm zat chhiarin chhinchhiah vek se, tih a ni bakah, hri danna pekna tura lirthei indaih lohna phuhruk dan tur dap ni se, tih a ni bawk.

Hri danna pek (immunisation) chungchangah hian Lawngtlai District chhunga health worker 70 chuang hnenah training pek a ni tawh a. Damdawi leh mamawh zualpui indaih lohna te phuhruk tura hma lak mek a ni bawk. Report-a a lan danin, sentut hri danna tum hnih lak tur la kim chin hi za zela 46 (46%) chauh an la nih avangin, chak zawka hma lak tum a ni a. Health worker-te cho phur nan kumin Republic Day lawmnaah hian Health worker thawk tha ber thlan chhuah hnenah chawimawina pek tum a ni bawk.

Vawiin thut khawmah hian Chief Medical Officer Dr Thani Pachuau bakah, CHC leh PHC hrang hranga Medical Officer-te, BDO, DIPRO leh tlawmngai pawl ai awhte leh member dangte an tel.