Madhya Pradesh Forest Department chuan Mizoram State Environment, Forest & Climate Change Department nen angkawpa saphu kawr tawlhruk man tura an thawhhona ah tha a thawh that avangin Pu C. Lalrinmuana, Range Officer, Central Forest Range, Kolasib Forest Division hnenah “Certificate of Excellence” a hlan a ni.

Pu C. Lalrinmuana hian saphu kawr tawlhruk case-a rinhlelh kai ber man kawngah a thawh that avangin lawmpuina hi hlan a ni a. Madhya Pradesh Forest Department hnuaia Special Task Force leh Mizoram Forest Department tangkawp hian India state 10 atangin inhnamhnawih mi 116 an man bakah international trafficker mi pahnih an man tel a ni. Saphu hi Wildlife (Protection) Act, 1972 Schedule-I hnuaia ramsa humhalh berte zing a mi a ni.