3996/2023-2024

Lawngtlai dated 28th February 2024: Vawiin khan DC Conference Hall, Lawngtlaiah District Task Force on Malaria Elimination leh District Level Task Force on Immunization member-te chuan thutkhawmna an nei a. Pu Cheemala Siva Gopal Reddy, IAS, Deputy Commissioner chuan hun a kaihruai a ni.

Pu Cheemala Siva Gopal Reddy, Deputy Commissioner chuan Lawngtlai district-a Malaria vei tam lutuk tih tlem a nih theih nan sawrkar, khawtlang leh tlawmngai pawl hruaitute thawh ho a pawimawi thu sawiin Malaria darh zel tur veng tur a ruahmanna awm te chu a hlawhtlin ngei theih nan tihtak zet a hma la turin kalkhawmte a chah a. National Immunization Day pual a zenghri pek beihpui thlakna kalpui tur ah pawh School Education, Social Welfare leh tlawmngai pawl te tanrual a tul tur thu a sawi.

Pu C.Khaipotha, District Consultant, Vector Borne Disease Control Programme tarlan danin National Framework for Malaria Elimination chuan mi 1000 zel ah mi 2 aia tlem, Annual Parasite Incident (API) an awm tur a nih thu sawiin Lawngtlai district-ah kum 2023 chhung khan API hi 54.12 a nih mek thu leh Category III-ah kan awm thu a sawi a. Malaria vangin mi 6 nunna chan an awm thu a tarlang bawk a ni. Kum 2023 chhung khan mi 47811 endik niin heng zing a mi 7915-te chuan Malaria an vei tih hmuhchhuah a ni a. Khaw tin ah thosi len damdawi a chiah (Long Lasting Insecticidal Net) sem chhuah tum a nih thu leh chumi atan chuan thosi len 105537 ruahman a nih thu a sawi. Khaw hrang hrangah Malaria lak a inven dan zirtirna kalpui tum a nih bak ah khaw 143-ah thosi hlo kah tum a nih thu tarlan niin hemi atan hian Deltamethrin hman tur a nih thu sawi a ni bawk.

Dr. Lalvenhimi Khiangte, Rapid Response Team, WHO chuan Lawngtlai district-a natna hrang hrang venna tur a vaccine pek dan te tarlangin March ni 5 atang a ni 7 chhung National Immunization Day kalpui tur ah hian naupang kum 5 chin 13167 hnen ah zenghri danna pek tum a nih thu a sawi a. Hei hi Polio Vaccination Booth 203, Transit Booth 3 leh House to House visit kaltlang a pek tur a nih thu  sawiin heng bak ah hian raltlan naupang 740 tuam tel tur a nih thu a tarlang bawk a ni.

Vawiin thutkhawmna ah hian Sr. CMO Dr. David Zothansanga, Dy. CMO Dr. S. Thaizi te telin Project Director, DRDA, District Education Officer, District Information & Public Relations Officer, District Agriculture Officer, EE, PWD leh PHED, District Fisheries Development Officer, District Programme Officer, CDPO, MJA, CYLA, LWA leh MHIP-te member an ni.